چەدجۋداعى فەستيۆال: قازاقستاندىق حور كورەرمەننىڭ ەرەكشە ىقىلاسىنا بولەندى
چەدجۋ. KAZINFORM - وڭتۇستىك كورەيادا وتكەن IX حالىقارالىق حور فەستيۆالىنىڭ اشىلۋ سالتاناتىندا ە. راحماديەۆ اتىنداعى مەملەكەتتىك اكادەميالىق فيلارمونيانىڭ كامەرالىق حورى قاتىسىپ، قازاقستاندىق ونەردىڭ جوعارى دەڭگەيىن پاش ەتتى.
دەلەگاتسيانى «قازاقستان-ازيا ساۋدا جانە مادەنيەتتى دامىتۋ قاۋىمداستىعىنىڭ» پرەزيديۋم ءتوراعاسى، ق ر ونەر قايراتكەرى، پروفەسسور دۇيسەن قاسەيىنوۆ باستاپ باردى.
فەستيۆال بارىسىندا قازاقستاندىق حوردىڭ ونەرى تالعامى جوعارى كورەرمەننىڭ ەرەكشە ىقىلاسىنا بولەندى. كورەرمەن قازاقتىڭ ۇلتتىق كيىمىنىڭ اسەمدىگىنە، اندەردىڭ اۋەزدىلىگى مەن جۇرەككە جەتەتىن نازىك يىرىمدەرىنە ءتانتى بولدى. اسىرەسە، دومبىرانىڭ سۇيەمەلدەۋىمەن ورىندالعان «مەن، مەن ەدىم» (ماحامبەت وتەمىس ۇلى) جانە «ون التى قىز» اندەرى كورەرمەندى باۋراپ، كونسەرتتىڭ شارىقتاۋ شەگىنە اينالدى.
«مەن، مەن ەدىم» تولعاۋىن حورعا لايىقتاپ وڭدەگەن - ۇجىمنىڭ دارىندى ءانشىسى ءارى مۋزىكالىق كوركەمدەۋشى ەربولات ابىلاي. ءال اننىڭ سولو-ورىنداۋشىسى - اقجول سەرىكوۆ. اقجولدىڭ ءاربىر نوتاداعى سەزىمتالدىعى مەن ساحناداعى جارقىراعان حاريزماسى كورەرمەندەردىڭ زور قوشەمەتىنە يە بولدى.
ءۇش كۇنگە جالعاسقان فەستيۆال باعدارلاماسى اياسىندا فيلورمونيانىڭ كامەرالىق حورى قازاقتىڭ ءداستۇرلى اندەرىمەن قاتار، الەمدىك كلاسسيكا مەن زاماناۋي شىعارمالاردى ورىندادى.
حور رەپەرتۋارىندا:
· «تاۋ ىشىندە» (ساكەن سەيفۋللين، بەيىمبەت دەمەۋوۆ) - جەكە ورىنداۋشى سانيا نيعمەتوۆا؛
· «ون التى قىز» (قازاق حالىق ءانى، سالتانات بەكماعامبەتوۆا) - جەكە ورىنداۋشى اقجول سەرىكوۆ؛
· «اينالايىن» (ءاليبي ءابدينۇروۆ)؛
· «قارلىعاش» (احمەت جۇبانوۆ، يبادوللا ماتاكوۆ، اناتولي مولودوۆ)؛
· «مەن، مەن ەدىم» (ماحامبەت وتەمىس ۇلى) - جەكە ورىنداۋشى اقجول سەرىكوۆ؛
· «ءبىر بالا» (قازاق حالىق ءانى، سالتانات بەكماعامبەتوۆا) - جەكە ورىنداۋشى ينديرا ايتبەرگەن؛
· «Las olas de la mar» (مارتينا كامارگو، حۋان مانۋەل ەرناندەس- مورالەس) - جەكە ورىنداۋشى ينديرا ايتبەرگەن؛
· «جايدارمان» (قازاق حالىق ءانى، لاتيف حاميدي)؛
· «قاماجاي» (قازاق حالىق ءانى، بوريس لياشكو).
فەستيۆال اياسىندا حور ۇجىمى ءار كۇن سايىن جاڭا باعدارلاما ۇسىندى، بۇل كورەرمەندەرگە قازاق مادەنيەتىنىڭ سان قىرلى بوياۋىن تەرەڭىرەك سەزىنۋگە مۇمكىندىك بەردى. اسىرەسە، دومبىرانىڭ نازىك ءۇنى مەن سوليستەردىڭ جاندى ورىنداۋى كورەرمەندەردى ەرەكشە اسەرگە بولەدى.
32 تالانتتى ءانشى ونەر كورسەتەتىن حوردىڭ كوركەمدىك جەتەكشىسى - قازاقستاننىڭ ەڭبەك سىڭىرگەن قايراتكەرى گۇلميرا قۇتتىباداموۆا، باس حورمەيستەر - دانارا تاشاتوۆا.
وڭتۇستىك كورەيانىڭ چەدجۋ ارالىندا وتكەن IX حالىقارالىق حور فەستيۆالى - الەمنىڭ تۇكپىر-تۇكپىرىنەن كەلگەن ۇزدىك حور ۇجىمدارىن بىرىكتىرگەن ايرىقشا مۋزىكالىق شارا. فەستيۆالدىڭ باستى ماقساتى - ءار ەلدىڭ مادەنيەتىن، ۇلتتىق مۋزىكالىق داستۇرلەرىن كورسەتۋ جانە حور ونەرىنىڭ سيقىرلى الەمىندە ءوزارا تاجىريبە الماسۋ.
ەسكە سالا كەتەيىك، بۇعان دەيىن دۇيسەن قاسەيىنوۆ ءداستۇرلى مۋزىكا جانە ءبي حالىقارالىق ۇيىمىنىڭ ەلشىسى اتانعانىن جازعان بولاتىنبىز.
