داستان ساتپايەۆ 16 جاسقا دەيىنگى فۋتبولشىلار اراسىندا الەمنىڭ ۇزدىك سۇرمەرگەنى اتاندى
استانا. KAZINFORM - قازاقستاندىق داستان ساتپايەۆ 16 جاسقا دەيىنگى فۋتبولشىلار اراسىندا الەمنىڭ ۇزدىك سۇرمەرگەنى اتاندى.
بۇل دەرەكتى برازيليالىق Noite de Copa پورتالى جاريالادى. ولار 2025-جىلى اتالعان جاستاعى فۋتبولشىلاردىڭ سوققان گولدارىن ەسەپكە العان. قازىر داستاننىڭ ەنشىسىندە 9 گول بار.
داستان الماتىدا 2008-جىلى دۇنيەگە كەلگەن. سەگىز جاسىندا «قايرات» اكادەمياسىنا ءتۇسىپ، دايىندىقتىڭ بارلىق ساتىسىنان ءوتتى.
ايتا كەتسەك، 2024-جىلدىڭ مامىر ايىندا داستان ساتبايەۆ «قايرات» كومانداسىندا دەبيۋت جاساعان ەڭ جاس ويىنشى رەتىندە تاريحقا ەندى. وتكەن QJ ليگاسىندا جاس فۋتبولشى 28 ويىندا 26 گول سوعىپ، 10 ناتيجەلى پاس بەردى.
سونداي-اق ساتبايەۆ ماۋسىمنىڭ ۇزدىك ويىنشىسى اتاعىن الدى. ال ۋ ە ف ا جاس وسپىرىمدەر ليگاسىندا (U19) 16 جاسار فۋتبولشى ءتورت ماتچتا ءبىر گول سوعىپ، ءبىر ناتيجەلى پاس بەردى.
داستان ساتپايەۆ قازاقستان فۋتبولى تاريحىندا رەكورد ورناتتى.
داستان ساتپايەۆ فۋتبولدان 2026-جىلعى الەم چەمپيوناتىنىڭ ىرىكتەۋ تۋرنيرىندە ۋەلسپەن وتكەن ماتچتا 74-مينۋتتا الاڭعا شىقتى.
ول 16 جاس 7 ايعا تولعان مەرزىمدە قازاقستان ۇلتتىق قۇراماسى ساپىندا العاشقى ويىنىن وتكىزىپ، رەكورد ورناتتى.
بۇدان بۇرىن ۇزدىك كورسەتكىش جامبىل كوكەيەۆكە (17 جاس 4 اي) تيەسىلى ەدى.
ەسكە سالساق، داستان ساتپايەۆ ق پ ل- ءدىڭ ءساۋىر ايىنداعى ۇزدىك ويىنشىسى اتاندى.
