دارىگەرلەر جۇرەگى 4 رەت توقتاپ قالعان، جاڭا بوسانعان انانى امان الىپ قالدى
قونايەۆ. KAZINFORM - الماتى وبلىسىنىڭ دارىگەرلەرى ءتورت رەت جۇرەگى توقتاپ قالعان، جاڭا بوسانعان انانى امان الىپ قالدى.
الماتى كوپسالالى كلينيكالىق اۋرۋحاناسى باسپا ءسوز قىزمەتىنىڭ مالىمەتىنشە، ايەل جۇكتىلىكتىڭ 36 اپتاسىندا بەلى مەن ءىشتىڭ تومەنگى جاعىنىڭ قاتتى اۋىرسىنۋ شاعىمەن تۇسكەن. دارىگەرلەر شۇعىل كەسار تىلىگى وتاسىن جاساپ، ايەل سالماعى 3390 گرام قىزدى دۇنيەگە اكەلدى. وتادان كەيىن سەگىزىنشى كۇنى جاڭا بوسانعان انا بالاسىمەن قاناعاتتانارلىق جاعدايدا اۋرۋحانادان شىعارىلدى. ءبىر اپتادان كەيىن جاس انا ەسىنەن تانىپ، اۋداندىق اۋرۋحاناعا قايتا ءتۇستى.
«دارىگەرلەر ناۋقاس تۇرىپ جاتقان رايىمبەك اۋدانىنىڭ نارىنقول اۋىلىنا شۇعىل جەتتى. قىسقا ۋاقىت ىشىندە ناۋقاستىڭ جۇرەگى ءتورت رەت توقتاپ قالدى. جۇرگىزىلگەن رەانيماتسيالىق ءىس-شارالاردىڭ ناتيجەسىندە جەرگىلىكتى رەانيماتولوگ پەن الماتى كوپسالالى كلينيكالىق اۋرۋحاناسىنىڭ ماماندارى پاتسيەنتتىڭ جۇرەك - قانتامىر قىزمەتىن قالپىنا كەلتىردى»، - دەيدى اككا كارديولوگ دارىگەرى ايگۇل تۇرساعاتوۆا.
ناۋقاستىڭ جۇرەك قىزمەتى قالپىنا كەلتىرىلگەننەن كەيىن رەسپۋبليكا كولەمىندە بەيىندى شتاتتان تىس ماماندارىنىڭ قاتىسۋىمەن تەلەمەديتسينالىق كونسيليۋم ۇيىمداستىرىلدى.
«ناۋقاستا قابىنۋ پروتسەسى تەز دامىپ، اعزاداعى كوپتەگەن مۇشەلەردىڭ اسقىنۋى بايقالىپ، سونىڭ سالدارىنان بۇيرەك جەتكىلىكسىزدىگى پايدا بولدى. ناۋقاس بىردەن prismaflex گومەوستازدى ەكستراكورپورالدى تۇزەتۋ اپپاراتىنا قوسىلدى. بۇل سەپتيكالىق شوكتىڭ اۋىر جاعدايىندا بۇيرەكتىڭ زاقىمدانۋى بار ناۋقاستارمەن جۇمىس ىستەۋگە ارنالعان ارنايى قۇرىلعى. بۇل اپپارات بىزگە 72 ساعات بويى تەراپيەۆتىك پلازمالىق الماسۋدى جانە بۇيرەكتى الماستىرۋ تەراپياسىن ۇزارتۋعا مۇمكىندىك بەردى، ونىڭ ىشىندە: مەتابوليزم ونىمدەرىن جويۋ، سۇيىقتىقتى شىعارۋ، قىشقىل-نەگىز بالانسىن باقىلاۋ جانە ەلەكتروليت بالانسىن قالپىنا كەلتىرۋ جۇمىستارى جۇرگىزىلدى»، - دەيدى نەفرولوگ دارىگەر مايرا قاعازبايەۆا.
ماماندار اۋداندىق اۋرۋحانادا ءتورت تاۋلىك بويى مەديتسينالىق كومەك كورسەتىپ، ۆازوپرەسسورلاردىڭ دوزالارىن ازايتىپ، جەلدەتكىشتە سانيتارلىق اۆياتسيا جەلىسى بويىنشا 5-تاۋلىكتە گەموديناميكانى تۇراقتاندىرۋ ءۇردىسى انىقتالعاننان كەيىن ناۋقاس اككا رەانيماتسياسىنا اۋىستىرىلدى.
«ءبىزدىڭ مامانداردىڭ ۇيلەسىمدى توپتىق جۇمىسى مەن كاسىبيلىگىنىڭ ارقاسىندا قازىرگى ۋاقىتتا ناۋقاس ءوزىن جاقسى سەزىنىپ، جالپى پالاتاعا اۋىستىرىلدى جانە حاتتاماعا سايكەس ەم قابىلداپ جاتىر. مۇنداي جاعدايلاردا، ادەتتە، ءولىم-ءجىتىم وتە جوعارى بولادى. ءبىز ناۋقاستى قۇتقارىپ قالعانىمىزعا قۋانىشتىمىز جانە ول كوپ ۇزاماي اۋىر زارداپتارسىز بالالارىنا ورالادى»، - دەپ ءبولىستى اككا ديرەكتورى ەلميرا بەرىكوۆا.
