داماسكىدەگى تەراكت: 15 ادام قازا تاۋىپ، 30 عا جۋىق ادام جاراقات الدى

استانا. KAZINFORM - داماسكىنىڭ شىعىسىنداعى حريستيان شىركەۋىندەگى تەراكتى كەزىندە كەمىندە 15 ادام قازا تاۋىپ، 30 عا جۋىق ادام جاراقات الدى، دەپ حابارلايدى ت ا س س.

Al Hadath تەلەارناسىنىڭ مالىمەتىنشە، شىركەۋگە كىرىپ كەتكەن لاڭكەس اۆتومات قارۋدان ءدىندارلارعا وق جاۋدىرىپ، ارتىنشا جارىلعىش قۇرىلعىنى ىسكە قوسقان.

سيريا بيلىگى بۇل شابۋىلعا جاۋاپكەرشىلىكتى «يسلام مەملەكەتى» ەكسترەميستىك توبىنا جۇكتەدى.

تەراكت حريستيان حالقى شوعىرلانعان دۋۆەيلا اۋدانىندا جاسالعان. پوليسيا وقيعا ورنىن قورشاۋعا الىپ، جارالانعانداردى الىپ كەتۋ ءۇشىن جەدەل جاردەم كولىكتەرى كەلىپ جاتىر.

بيلىك وكىلدەرىنىڭ مالىمەتىنشە، قازا تاپقاندار سانى ءالى دە ارتۋى مۇمكىن.