داۋلەت تۇرلىحانوۆتىڭ ۇلى تاعى دا سوت الدىندا جاۋاپ بەرەدى

استانا. قازاقپارات - ءماجىلىس دەپۋتاتى داۋلەت تۇرلىحانوۆتىڭ ۇلى نۇراسىل بولات تاعى دا سوت الدىندا جاۋاپ بەرەدى. مۇنى الماتى سوتىنىڭ باسپا ءسوز قىزمەتى راستادى.

«نۇراسىل بولاتتىڭ ءىسى بويىنشا ماتەريالدار الماتىنىڭ مەدەۋ اۋدانىنىڭ 2-اۋداندىق سوتىنا ءتۇستى. قازىرگى ۋاقىتتا ماتەريالدار سوتتا تىركەلىپ جاتقاندىقتان، ونى قاراستىرۋ مەرزىمى ءالى بەلگىلەنگەن جوق»، - دەپ حابارلادى الماتى سوتىنىڭ باسپا ءسوز قىزمەتى.

ەسكە سالايىق، بۇعان دەيىن الەۋمەتتىك جەلىدە نۇراسىل بولاتتىڭ تويدا جۇرگەن ۆيدەوسى جاريالاندى.

وسىدان ءبىر جىل بۇرىن، ناقتىلاساق، 2023-جىلدىڭ 11-اقپانىندا اسكەري قىزمەتكەر نۇراسىل بولات الماتىداعى تۇنگى كلۋبتىڭ جانىندا ەرلى-زايىپتى اننا مەن ولەگ چەرنوۆتاردى ۇرىپ-سوققان بولاتىن.

جاقىندا ءماجىلىس دەپۋتاتى داۋلەت تۇرلىحانوۆتىڭ شارتتى مەرزىمدە جۇرگەن ۇلى كەزەكتى رەت پروباتسيالىق باقىلاۋ ءتارتىبىن بۇزعانى بەلگىلى بولدى. الەۋمەتتىك جەلىدە ونىڭ تويدا جۇرگەنى كورسەتىلگەن ۆيدەو تارادى. سالتاناتتى كەش 11-قازان كۇنى الماتىدا بولعان.

ايتا كەتەيىك، بوستاندىعىن شەكتەۋ تارتىبىنە ساي دەپۋتاتتىڭ بالاسىنا مۇنداي ءىس-شارالارعا بارۋعا شەكتەۋ قويىلعان بولاتىن.

قىلمىستىق اتقارۋ جۇيەسى كوميتەتى نۇراسىل بولات پروباتسيالىق باقىلاۋ تالابىن بۇزعاندىقتان، ونىڭ جازاسى بوستاندىعىن شەكتەۋدەن، بوستاندىقتان ايىرۋعا اۋىستىرىلۋى مۇمكىن ەكەنىن حابارلادى.

ال جۋرناليستەر ونىڭ اكەسى، ءماجىلىس دەپۋتاتىنان ۇلىنىڭ الماتىعا تويعا بارعانىن بىلە مە دەگەن سۇراق قويدى.

«بىلگەن جوقپىن. بۇل ىسكە ارالاسقىم كەلمەيدى. جاس قوي ءالى... ونىمەن ۇنەمى سويلەسەتىنمىن. قاي اكە بالاسىنىڭ جامان بولعانىن قالايدى؟ ارينە، بۇل تۋرالى ويلايمىن. ءبىز وعان قولىمىزدان كەلگەننىڭ ءبارىن جاسادىق، ءبىراق نەگە جانە قالاي بولعانىن بىلمەيمىن. جاسى نەبارى 21 جاستا بولسا دا، سوڭىنان اڭدىپ ءجۇر. ەگەر ونىڭ پسيحيكاسىنا زارداپ تيسە، كىم جاۋاپتى؟ سوندىقتان ايتارىم - مەنىڭ بالام وتە جاقسى، تاربيەلى. ەندى دوستارىمەن ارالاسا الماي ما؟ تۋعان كۇن كەشىنە بارۋعا بولماي ما؟ بۇل تۋرالى قاتتى الاڭدايمىن. بالامنىڭ دەنساۋلىعى دا الاڭداتادى»، - دەدى تۇرلىحانوۆ ءماجىلىس كۋلۋارىندا.