دالا سۇڭقارى-2024: جامبىلدا قازاقستان مەن قىرعىزستاننىڭ اسكەري وقۋ-جاتتىعۋى اياقتالدى

Оқу-жаттығу
Фото: Владимир Мартыненко

تاراز. KAZINFORM - جامبىل وبلىسىندا ءبىر اپتاعا سوزىلعان قازاقستان مەن قىرعىزستان قارۋلى كۇشتەرىنىڭ «دالا سۇڭقارى-2024» بىرلەسكەن تاكتيكالىق وقۋ-جاتتىعۋى اياقتالدى.

وقۋ-جاتتىعۋدىڭ سوڭعى كەزەڭىنە «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور قۋانىشبەك ۇشتايەۆ پەن قىرعىز رەسپۋبليكاسى قارۋلى كۇشتەرى باس شتابىنىڭ وكىلى پولكوۆنيك ءادىل كەڭەس ۋلۋ قاتىستى.

«وقۋ-جاتتىعۋ تاكتيكالىق ەپيزودپەن اياقتالدى. جاتتىعۋ بارىسىندا قازاقستان مەن قىرعىزستان اسكەري قىزمەتشىلەرىنىڭ ارالاس كونتينگەنتى يميتاتسيالانعان جاۋدىڭ بازالىق اۋدانىندا ءورت رەيدىن جۇرگىزىپ، ونى جويدى. بۇل وقۋ-جاتتىعۋدى ۇيىمداستىرماس بۇرىن ەكى ەلدىڭ اسكەري قىزمەتشىلەرى ون كۇن بويى پراكتيكالىق جاتتىعۋلار وتكىزىپ، وزدەرىنىڭ كاسىبي داعدىلارىن شىڭدادى. بىرىككەن توپتاردا ولار يميتاتسيالانعان جاۋدىڭ بازالىق لاگەرىن انىقتاۋ ءۇشىن تالاس جوتاسىنىڭ بۇكىل تاۋلى ايماعىن ارالاپ شىقتى. تاۋلى ايماقتا تاپسىرمالاردى ورىنداي وتىرىپ، توپتار قاداعالاپ وتىرۋ ونەرىن پايدالانىپ، قارسىلاستى تاڭ قالدىراتىنداي ەتىپ مانيەۆر جاسادى»، - دەيدى «وڭتۇستىك» وڭىرلىك قولباسشىلىعى بارلاۋ ءبولىمىنىڭ باستىعى پولكوۆنيك ەربول سەرعازين.

Оқу-жаттығу
Фото: Владимир Мартыненко

پولكونيكتىڭ ايتۋىنشا، ءبىزدىڭ جاۋىنگەرلەرىمىز دە، قىرعىزستاننىڭ قارۋلى كۇشتەرى دە، جالپى قۇراما بولىمدەر بەلگىلەنگەن جاۋىنگەرلىك وقۋ-جاتتىعۋ تاپسىرمالارى مەن جۇكتەلگەن مىندەتتەردى تولىعىمەن ورىنداپ شىققان.

وقۋ-جاتتىعۋعا قازاقستاننان تاۋ قورىقشىلار پولكىمەن قاتار، اسكەري-اۋە كۇشتەرىنىڭ وكىلدەرى دە قاتىسقان. سونداي-اق، بۇل جيىنعا شىمكەنت اۆيابازاسىنىڭ ۇشقىشتارى مەن تاراز ۇشقىشسىز ۇشۋ جۇيەلەرىن جاۋىنگەرلىك پايدالانۋ ورتالىعىنىڭ وپەراتورلارى دا اتسالىسقان.

Оқу-жаттығу
Фото: Владимир Мартыненко

«بۇل وقۋ-جاتتىعۋدىڭ نەگىزگى ماقساتتارى مەن مىندەتتەرى، بىرىنشىدەن، مەملەكەتتەرىمىز بەن قارۋلى كۇشتەر اراسىندا دوستىق قارىم-قاتىناس ورناتۋ، ەكىنشىدەن تاجىريبە الماسۋ بولدى. ەكى مەملەكەتتىڭ قارۋلى كۇشتەرى ءبىزدىڭ تۇتاستىعىمىزدى، اۋماقتارىمىز بەن شەكارالارىمىزدىڭ تۇتاستىعىن ساقتاۋ ءۇشىن قولدان كەلگەننىڭ ءبارىن جاساۋى ءتيىس»، - دەپ اتاپ ءوتتى وڭتۇستىك وڭىرلىك قولباسشىلىعىنىڭ قولباسشىسى گەنەرال-مايور قۋانىشبەك ۇشتايەۆ.

وقۋ-جاتتىعۋدىڭ سوڭىندا ەكى تاراپ ءوزارا ەستەلىك سىيلىقتارمەن الماسىپ، ۇزدىك ناتيجە كورسەتكەن اسكەريلەر ارنايى العىس حاتتارمەن ماراپاتتالدى.

әскер
Фото: Қорғаныс министрлігі

«قىرعىز رەسپۋبليكاسى قارۋلى كۇشتەرى باسشىلىعىنىڭ اتىنان قازاقستان قارۋلى كۇشتەرىنىڭ، اسىرەسە «وڭتۇستىك» وڭىرلىك قولباسشىلىعىنىڭ باسشىلىعىنا «دالا سۇڭقارى-2024» بىرلەسكەن تاكتيكالىق ارنايى وقۋ-جاتتىعۋىن ۇيىمداستىرعانى جانە وتكىزگەنى ءۇشىن العىسىمدى بىلدىرگىم كەلەدى. بۇل وقۋ-جاتتىعۋ حالىقارالىق تەرروريزم مەن ەكسترەميزم كورىنىسىمەن كۇرەسۋگە مۇمكىندىك بەرەدى. وقۋ-جاتتىعۋعا قاتىسۋشىلار ۇلكەن تاجىريبە جينادى، ءوزارا بايلانىس نىعايا ءتۇستى دەپ ەسەپتەيمىن»، - دەدى قىرعىز رەسپۋبليكاسى قارۋلى كۇشتەرى باس شتابىنىڭ وكىلى پولكوۆنيك ءادىل كەڭەس ۋلۋ.

Оқу-жаттығу
Фото: Владимир Мартыненко

وقۋ-جاتتىعۋدىڭ جابىلۋ سالتاناتىندا قىرعىز تاراپى سونىمەن قاتار، تاۋ-كەن قازىلار پولكىنىڭ كومانديرى پودپولكوۆنيك الماس وتىنشينوۆقا ايرىقشا العىستارىن ءبىلدىردى.

سوڭعى جاڭالىقتار