د د س ۇ قىركۇيەك ايىندا 47 مىڭنان استام ادام تىرىسقاقپەن اۋىرعانىن حابارلادى

استانا. KAZINFORM - قىركۇيەك ايىندا تىرىسقاقپەن 47 مىڭنان استام ادام اۋىرىپ، 580 نەن استامى قايتىس بولدى. بۇل تۋرالى نيگەر مەن تايلاندتا تىركەلگەن اۋرۋ وشاقتارىنا نازار اۋدارعان دۇنيەجۇزىلىك دەنساۋلىق ساقتاۋ ۇيىمى (د د س ۇ) حابارلادى، دەپ جازادى ت ا س س.

دۇنيەجۇزىلىك دەنساۋلىق ساقتاۋ ۇيىمىنىڭ اقپاراتىنا سايكەس، قىركۇيەكتە د د س ۇ- نىڭ ءۇش ايماعىنداعى 14 ەلدە 47234 تىرىسقاق اۋرۋى جانە 583 ءولىم تىركەلگەن. تامىز ايىمەن سالىستىرعاندا وسى ايدا جۇقتىرۋ كورسەتكىشى 15 پايىزعا ازايعانىمەن، ءولىم كورسەتكىشى 89 پايىزعا ءوستى. اۋعانستاندا تامىز ايىندا 17856 ادام، سۋداندا – 15047، پاكىستاندا – 5521، نيگەريادا – 3615، يەمەندە - 2706 ادام اۋىرعان.

1-قاڭتار مەن 29-قىركۇيەك ارالىعىندا دۇنيەجۇزىندە 439724 ادام تىرىسقاقپەن اۋىرىپ، وسى اۋرۋدان 3432 ادام قايتىس بولدى. اۋرۋ وشاعى اسىرەسە شىعىس جەرورتا تەڭىزى ايماعىندا جانە افريكادادا تىركەلدى. جىل باسىنان بەرى اۋعانستاندا 140 مىڭنان استام، پاكىستاندا 60 مىڭنان استام، يەمەندە 36 مىڭنان استام، كونگو دەموكراتيالىق رەسپۋبليكاسىندا 25 مىڭنان استام، ەفيوپيادا 24 مىڭعا جۋىق جاعداي تىركەلدى.

تىرىسقاق - تىرىسقاق ۆيبريونىنان تۋىندايتىن اسا قاۋىپتى جۇقپالى اۋرۋ. بۇل اۋرۋ قوزدىرعىشى اعزاعا لاستانعان تاماقپەن نەمەسە سۋمەن تۇسكەندە پايدا بولادى.

وسىعان دەيىن د د س ۇ- نىڭ مايمىل شەشەگىمەن كۇرەسۋ ءۇشىن 135 ميلليون دوللارلىق جاھاندىق جوسپاردى ىسكە قوسقانىن حابارلادىق.