ءيت اربادان قۇلاعان يەسىن تاراز پوليتسەيلەرىنە سەنىپ تاپسىردى
حاتيكو ءيتى قوجايىنىن تاراز پوليتسەيلەرىنە سەنىپ تاپسىردى، دەپ حابارلايدى قازاقپارات جەرگىلىكتى پ د باسپا ءسوز قىزمەتىنە سىلتەمە جاساپ.

7-قازاندا وبلىس ورتالىعى كوشەلەرىنىڭ بىرىندە پوليتسەيلەر جولدىڭ ورتاسىندا توڭكەرىلىپ جاتقان مۇگەدەكتەر ارباسىن، جانىنداعى قارت كىسى مەن ءيتتى بايقاعان.
پوليتسەيلەر حاتيكو مەن ونىڭ يەسى اناتولي دەربەنوۆتى بىردەن تانىدى. زەينەتكەر جاساندى كەدەرگىدەن وتە الماي، اۋدارىلىپ قالعان.
ءيت وسى ۋاقىت ىشىندە يەسىن مۇقيات كۇزەتىپ، جانىندا وتىردى. پاترۋلدىك پوليتسيا ينسپەكتورلارى بىردەن قارت كىسىگە كومەككە ۇمتىلعانىمەن ءيت يەسىنە ەشكىمدى جولاتپاي قويعان. دەگەنمەن جاعداي ءساتتى اياقتالدى.
- ءيت تىستەپ الۋى مۇمكىن ەدى. قالاداعى بارلىق ادامدار ونىڭ قاباعان ەكەنىن بىلەدى. يەسىن ءاردايىم قورعايدى. ءبىزدىڭ باستى مىندەتىمىز - اتاعا كومەك كورسەتۋ بولدى. ول باسىن جاراقاتتاپ العان بولاتىن، - دەيدى تاراز قالالىق پ ب پ پ ب 1-ۆزۆود كومانديرى نۇربول مىرزاكەرىم.
قازىرگى ۋاقىتتا اتا مەن ونىڭ ءيتىنىڭ جاعدايى جاقسى، دارىگەردىڭ قاراۋىنان كەيىن ەكەۋى دە ۇيىنە جىبەرىلدى.