ءوز-ءوزىن ىزدەگەن ادامدار دا كەلگەن. جۋرناليست «بارمىسىڭ باۋىرىمداعى» قىزىقتى جايتتارىن ايتىپ بەردى
استانا. KAZINFORM - تانىمال جۋرناليست قىمبات دوسجان مەديا دامىتۋ قورىنىڭ «كەلەسى كىم؟» ايدارىنا بەرگەن سۇحباتىندا «بارمىسىڭ باۋىرىم؟» باعدارلاماسىندا بولعان، ەسىندە قاتتى قالعان وقيعالارىن ايتىپ بەردى.
جۋرناليستىڭ ايتۋىنشا، باعدارلامادا ءتىپتى ءوزىن-ءوزى ىزدەپ كەلگەن ادامدار دا بولعان.
«بۇل ومىرشەڭ باعدارلاما ءوزى. مەنىڭ ويىمشا قوعامدا ونىڭ ءبارى دۇنيە قانشا تۇر، ول سونشا بولاتىن نارسە، بۇل ۇلكەن الەۋمەتتىك باعدارلاما. ومىردە ءبىر ماسەلەنى شەشىلدى، ەندى ول قايتالانبايدى دەپ ايتا المايسىڭ، ويتكەنى ادام جوعالادى، ءبىر-ءبىرىن ىزدەيدى، ءبىزدىڭ باعدارلاماعا ءتىپتى ءوز-ءوزىن ىزدەگەن ادامدار دا كەلگەن. مىسالى، «مەنى كەزىندە باسقا بىرەۋ اسىراپ الىپتى، اكە-شەشەمنىڭ كىم ەكەنىن، رۋىمنىڭ قانداي ەكەنىن بىلمەيمىن، ۇيلەنەيىن دەسەم ءار كەزدەسكەن قىزعا قارىنداسىم سەكىلدى قارايتىن بولىپپىن. مۇمكىن بۇل مەنىڭ تۋىسىم شىعار دەپ قورقام، سوندىقتان ءوزىمنىڭ كىم ەكەنىمدى ءبىلۋ ءۇشىن كەلدىم» دەگەن ۇلكەن ەر ازاماتتار دا كەلدى. سوندىقتان بۇل باعدارلاما راسىمەندە حالىققا كومەك بەرەتىن حابار.
«ءبىر كىسىنىڭ ەكى بالاسىن 9 جىلداي باعىپ، ادام قىلدىم، ەندى ولاردىڭ اناسىن ىزدەپ، تاۋىپ بەرشى» دەگەن ايەل كىسى حابارلاستى. ايتۋىنشا، «بازاردا بىرگە تۇردىق، ايەل جانىما كەلىپ، مەن الماتىعا بارىپ كەلەمىن، ەكى بالامدى بىرنەشە كۇنگە ۇيىڭە قالدىرىپ كەتەيىن دەپ تاستاپ كەتتى. سودان بەرى 9 جىل ءوتتى، ايەل جوق. مەن بۇل بالالاردى نە ىستەيمىن، بالالار ۇيىنە تاپسىرعان جوقپىن» دەدى. سونىمەن، ءبىز ەكى بالانىڭ اناسىن ىزدەي باستادىق. سويتسەك بۇل ايەلدىڭ تاعى ەكى بالاسى بار بولىپ شىقتى. ىزدەپ ءجۇرىپ ول ەكى بالانى دا تاستاپ كەتكەن انانىڭ بولەسىنىڭ ۇيىنەن تاپتىق. بالالاردى تاستاپ كەتكەن كەزدە ەڭ كىشكەنتايى سول كەزدە 2 جاسقا ءالى تولماعان، ال ۇلكەنى 8 جاستا بولىپتى. سودان مەن ول بالالاردىڭ اناسىن تاپتىم، ول بۇرىنعى وڭتۇستىك قازاقستان وبلىسى، سارىاعاش اۋدانىنىڭ ءبىر اۋىلىندا تۇرادى ەكەن، تۇرمىسقا شىققان. وكىنىشكە قاراي، مەن ول ايەلدىڭ ءتۇرىن كورە المادىم. كەلەم دەپ مەنى الدادى. مەن ءتىپتى وعان پويىزىنا بيلەت الىپ بەردىم، ول كەزدە قازىرگىدەي اقشانى قوسىمشا ارقىلى اۋدارىپ جىبەرە المايسىڭ عوي، ارنايى پوشتا ارقىلى سالدىم اقشانى. مىنە، پويىزعا مىنەيىن دەپ تۇرمىن دەگەن ادام كەلگەن جوق. ال ستۋديادا ءتورت بالا اناسىن كۇتىپ وتىر. سوسىن ۇيىنە قوڭىراۋ شالىپ، بالالارمەن تەلەفون ارقىلى سويلەستىردىك، سونداعى ونىڭ ايتقانى «ماما، قايدا ءجۇرسىڭ؟» دەگەن سۇراققا «ءيا، نە ىستەپ جاتىرسىڭدار؟» دەپ جاۋاپ بەردى. مۇنى ەستىگەن ءتورت بالا نە دەپ جاۋاپ بەرەرلەرىن بىلمەي ماعان قارادى. شىداي الماي جاڭاعى ايەلگە ايعايلادىم. «قازىر عانا دالاعا نان الىپ كەتۋگە شىققان ادام سەكىلدى بولىپ تۇرسىڭ عوي، سەن بالالارىڭدى 9 جىل بويى كورگەن جوقسىڭ عوي، نە ىستەپ جاتىرسىڭدار دەگەن نە سۇراق، ستۋدياعا كەلىپ شاي ءىشىپ وتىر مەندە» دەدىم. شىنىمدى ايتسام، سودان كەيىن ول بالالاردىڭ تاعدىرىن باقىلاپ وتىرا المادىم. 9 جىل بويى باققان ەكى ايەل بالالاردى ەكى جاققا قايتا الىپ كەتتى. ودان بەرى 20 جىل ءوتتى، ۇلكەندەرىنىڭ جاسى 35-40 كەلىپ قالعان شىعار»، - دەپ ەسىنە الدى ول.
اقپارات دەرەككوزى: Massaget.kz
