ءورت قاۋىپسىزدىگىنە سپۋتنيكتەن مونيتورينگ جۇرگىزەتىن جۇيە جەتىلدىرىلەدى

استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ۇكىمەت وتىرىسىندا ءورت قاۋىپسىزدىگىنە سپۋتنيكتەن مونيتورينگ جۇرگىزەتىن جۇيە جەتىلدىرىلەتىنىن ايتتى.

- تابيعي ورتتەردىڭ تۋىنداۋ قاۋپىنىڭ الدىن الۋ ءۇشىن مينيسترلىك ءورت قاۋىپتىلىك كلاسى مەن ءورت قاۋىپتىلىك يندەكسىن كورسەتەتىن كارتا ازىرلەدى. اتالعان كارتا mchs.gharysh.kz گەواقپاراتتىق جۇيەسىندە جانە Tabigat.gov.kz اقپاراتتىق جۇيەسىندە قولجەتىمدى. بۇل ءتاسىل جەرۇستى مەتەوستانتسيالارى مەن جەردى قاشىقتان زوندتاۋ سپۋتنيكتىك دەرەكتەرىن بىرىكتىرەدى. ناتيجەسىندە بۇكىل ەل اۋماعى قامتىلىپ، بولجام دالدىگى ارتادى، - دەدى ول.

سونداي-اق، تسيفرلىق تەحنولوگيالاردىڭ كومەگىمەن ءورت بولۋى مۇمكىن جەردەگى ەڭ ىستىق نۇكتەلەردى باقىلاۋ ارقىلى ءورت قاۋىپسىزدىگىنىڭ بەتالىسى بولجاۋ ءتاسىلى سىناقتان ءوتىپ جاتىر.

- تەمپەراتۋراسى قالىپتان تىس جوعارى ايماقتار سپۋتنيك ارقىلى تىركەلىپ، جەرۇستى ستانتسياسىنا بەرىلەدى جانە 2- 4 ساعات ىشىندە كارتادا كورسەتىلەدى. قازىرگى تاڭدا ەكولوگيا جانە توتەنشە جاعدايلار مينيسترلىكتەرى بۇل كارتالارعا mchs.gharysh.kz گەواقپاراتتىق جۇيەسىندە جانە Tabigat.gov.kz اقپاراتتىق جۇيەسىندە قول جەتكىزىپ وتىر. كورسەتۋ ۋاقىتىن 30 مينۋتقا دەيىن قىسقارتۋ ءۇشىن شىلدە ايىندا جەرۇستى ستانتسياسىن جاڭعىرتۋ جوسپارلانۋدا، - دەدى جاسلان ماديەۆ.

ايتا كەتەيىك، شىعىس قازاقستان وبلىسى زايسان اۋدانىندا ءورت سوندىرۋشىلەر قامىس پەن ءشوپتى شارپىعان ءتىلسىز جاۋمەن ءالى كۇرەسىپ جاتىر.