ءتىس ەمدەۋ قىمباتتاپ بارادى: قازاقستاندىقتار ستوماتولوگياعا قانشا اقشا جۇمسايدى؟

ساراپشىلاردىڭ ايتۋىنشا، ماسەلە باعانىڭ قىمباتتاۋىندا عانا ەمەس. ادەتتە ءتىس اۋىرعان ادامداردىڭ كوپشىلىگى سوڭىنا دەيىن سوزىپ، دەر كەزىندە ەمدەلمەيدى، ءوز قۇقىقتارىن بىلمەيدى جانە كلينيكاداعى سمەتانى تۇسىنبەي قالادى. سالدارىنان قاراپايىم ەمنىڭ ءوزى كەيىن بىرنەشە ەسە قىمباتقا ءتۇسۋى مۇمكىن.

ۇلتتىق ستاتيستيكا بيۋروسىنىڭ مالىمەتىنشە، 2025 -جىلدىڭ ءۇشىنشى توقسانىندا ءبىر ءۇي شارۋاشىلىعىنىڭ ستوماتولوگيالىق ەمگە جۇمساعان شىعىنى وتكەن جىلمەن سالىستىرعاندا 30,9 پايىز وسكەن. ال اقىلى ستوماتولوگيالىق قىزمەت كولەمى 224,7 ميلليارد تەڭگەگە جەتكەن. بۇل 2023 -جىلمەن سالىستىرعاندا ەكى ەسە كوپ.

قازىر ستوماتولوگيا قازاقستاندىقتاردىڭ دەنساۋلىققا جۇمسايتىن جالپى شىعىنىنىڭ شامامەن 28 پايىزىن قۇرايدى. ماماندار مۇنى ادامداردىڭ ءتىستى ءجيى ەمدەتۋىمەن ەمەس، اۋرۋدى اسقىندىرىپ بارىپ قارالۋىمەن بايلانىستىرادى.

كەيىنگە قالدىرىلعان ەم - قىمبات ەم

ستوماتولوگياداعى ەڭ ۇلكەن قاتەلىكتىڭ ءبىرى - ەمدى كەيىنگە قالدىرۋ. ماسەلەن، ءتىس جەگى ەندى باستالعاندا ونى 20-30 مىڭ تەڭگەگە ەمدەۋگە بولادى. ءبىراق ۋاقىت وتكىزىپ الساڭىز، ول پۋلپيتكە اينالادى. ال پۋلپيتتى ەمدەۋ قۇنى 40-90 مىڭ تەڭگەگە دەيىن جەتەدى.

ەگەر ول دا ەلەنبەسە، ماسەلە ءتىپتى كۇردەلەنە تۇسەدى: ءتىس جۇلىنىپ، كەيىن يمپلانت قاجەت بولۋى مۇمكىن. ال ءبىر يمپلانت باعاسى 80 مىڭنان 240 مىڭ تەڭگەگە دەيىن بارادى. بۇعان قوسا، كورونكا ءۇشىن تاعى 60-120 مىڭ تەڭگە تولەۋگە تۋرا كەلەدى.

ءتىس ەمىن وتباسىلىق بيۋدجەتكە قوسىپ قويىڭىز

ماماندار ستوماتولوگيانى الدىن الا جوسپارلاناتىن تۇراقتى شىعىن رەتىندە قاراستىرۋ كەرەك دەيدى.

ءتورت ادامنان تۇراتىن وتباسى ءۇشىن شامامەن مىناداي جىلدىق بيۋدجەت قاجەت:

ەرەسەكتەرگە جىلىنا ەكى رەت پروفيلاكتيكالىق تازالاۋ - 60-80 مىڭ تەڭگە؛

بالالاردىڭ تەكسەرۋى مەن ەمى - 30-50 مىڭ تەڭگە؛

كۇتپەگەن ەمگە ارنالعان قور - 100-150 مىڭ تەڭگە.

وسىلايشا، وتباسىنىڭ جىلدىق ستوماتولوگيالىق بيۋدجەتى ورتا ەسەپپەن 200-280 مىڭ تەڭگەنى قۇرايدى. بۇل ايىنا شامامەن 17-23 مىڭ تەڭگە جيناۋ دەگەن ءسوز.

اقشا جەتپەسە، الدىمەن نەنى ەمدەۋ كەرەك؟

ەگەر قارجى شەكتەۋلى بولسا، ەمدى دۇرىس باسىمدىقپەن جوسپارلاۋ ماڭىزدى.

ءبىرىنشى كەزەكتە اۋىرسىنۋ مەن قابىنۋدى ەمدەۋ قاجەت. جەدەل اۋىرسىنۋ، ىرىڭدەۋ نەمەسە سىنعان ءتىس كۇتتىرمەيدى.

ەكىنشى كەزەكتە - ءتىس جەگى. سەبەبى ۋاقىت وتە كەلە ول پۋلپيتكە اينالىپ، شىعىندى ارتتىرادى.

ال ءۇشىنشى ماڭىزدى ماسەلە - پروفيلاكتيكالىق تازالاۋ. ونىڭ باعاسى 15-25 مىڭ تەڭگە ارالىعىندا بولعانىمەن، ءدال وسى پروتسەدۋرا ءىرى شىعىنداردىڭ الدىن الادى.

قانداي ستوماتولوگيالىق قىزمەتتەر تەگىن؟

كوپشىلىك بىلە بەرمەيتىن ماڭىزدى جايت - ستوماتولوگيالىق كومەكتىڭ ءبىر بولىگى م ءا م س ارقىلى تەگىن كورسەتىلەدى.

جوسپارلى ستوماتولوگيالىق كومەك:

18 جاسقا دەيىنگى بالالارعا؛

جۇكتى ايەلدەرگە تەگىن.

ولارعا قارالۋ، ءتىس جەگىن ەمدەۋ، پلومبا قويۋ، ءپۋلپيتتى ەمدەۋ، ءتىس جۇلۋ جانە انەستەزيا قىزمەتتەرى كىرەدى.

ال شۇعىل كومەك زەينەتكەرلەرگە، مۇگەدەكتىگى بار ازاماتتارعا، كوپبالالى انالارعا جانە ءبىرقاتار الەۋمەتتىك ساناتتارعا كورسەتىلەدى.

بۇل ءۇشىن ەمحاناعا جولداما قاجەت ەمەس. تەك الەۋمەتتىك مەديتسينالىق ساقتاندىرۋ قورىمەن كەلىسىمشارت جاساعان كلينيكاعا جۇگىنۋ جەتكىلىكتى.

كلينيكا سمەتاسىن قالاي وقۋ كەرەك؟

ستوماتولوگيادا ەم باستالماس بۇرىن كلينيكا تولىق ەم جوسپارى مەن جازباشا سمەتا ۇسىنۋعا مىندەتتى. ەگەر باعا تەك اۋىزشا ايتىلسا، مىندەتتى تۇردە جازباشا نۇسقاسىن سۇراعان ءجون.

سمەتادا مىنالار ناقتى كورسەتىلۋى كەرەك:

قانداي ءتىس ەمدەلەدى؛

قانداي ماتەريال قولدانىلادى؛

انەستەزيا باعاسى؛

رەنتگەن مەن دياگنوستيكا قۇنى؛

كەپىلدىك مەرزىمى.

ەگەر سمەتا تىم قىمبات كورىنسە، بىردەن كەلىسە سالماۋ كەرەك. مۇنداي جاعدايدا ەكىنشى ماماننىڭ پىكىرىن الۋ ارتىق بولمايدى.

قاي جەردە ۇنەمدەۋگە بولمايدى؟

ماماندار بىرنەشە نارسەدەن ۇنەمدەۋدىڭ قاۋىپتى ەكەنىن ەسكەرتەدى:

رەنتگەن مەن دياگنوستيكا؛

ساپالى پلومبا ماتەريالدارى؛

انەستەزيا؛

بالالار ستوماتولوگياسى.

اسىرەسە ءسۇت تىستەرىن ەمدەمەۋ كەيىن ورتودونتيالىق ماسەلەلەرگە اكەلۋى مۇمكىن.

قاي جەردە ۇنەمدەۋگە بولادى؟

ۇنەمدەۋدىڭ ءتيىمدى جولدارى دا بار:

بالالاردى م ءا م س ارقىلى تەگىن ەمدەتۋ؛

بىرنەشە كلينيكانىڭ باعاسىن سالىستىرۋ؛

وقۋ كلينيكالارىنا جۇگىنۋ؛

ەمدى كەزەڭ- كەزەڭىمەن جاساۋ؛

تۇراقتى پروفيلاكتيكا جاساتۋ.

مامانداردىڭ ايتۋىنشا، ءدال پروفيلاكتيكا - ستوماتولوگياداعى ەڭ ءتيىمدى ينۆەستيتسيا.

قازاقستاندا ستوماتولوگيالىق قىزمەت باعاسى ارزاندامايدى. كەرىسىنشە، شىعىن كولەمى جىل سايىن ءوسىپ كەلەدى. دەگەنمەن تۇراقتى تۇردە تەكسەرىلىپ، جاعدايدىڭ ۋشىعىپ كەتپەۋىن قاداعالاساڭىز، وندا ءبىراز قارجىنى ۇنەمدەۋگە بولادى.

سوندىقتان ماماندار قازاقستاندىقتارعا ءۇش قاراپايىم قادام ۇسىنادى:

بالالارعا ارنالعان م ءا م س مۇمكىندىگىن پايدالانۋ؛

جىلىنا ەكى رەت پروفيلاكتيكالىق تازالاۋدان ءوتۋ؛

اي سايىن ستوماتولوگيالىق قورعا اقشا جيناۋ.

دەرەككوز el.kz