ءتورت تۇلىكتىڭ سۇيەگىنە سۋرەت سالىپ، ەرەكشە كادەسىي دايىندايتىن اقتوبەلىك شەبەر
گۇلدانا سەرىك قىزى - ەرەكشە ۇلگىدە كادەسىي دايىنداپ جۇرگەن تالانتتى ءارى ساناۋلى جاستاردىڭ ءبىرى. Kazinform ءتىلشىسى بيىل قازاقستان ەتنوديزاينەرلەر وداعىنا قابىلدانعان اقتوبەلىك شەبەرمەن از-كەم اڭگىمەلەسىپ، كوپشىلىك قىزىعۋشىلىعىن تۋدىرعان تۋىندىلارى جونىندە سۇرادى.
ونىڭ «ءومىر جالعاسى» اتتى تۋىندىسى از ۋاقىتتا كورەرمەن كوزايىمىنا اينالىپ ۇلگەرگەن.
- بۇل ءوز ءومىرىمنىڭ ايناسى. الدىمەن ءوزىمنىڭ قىز كۇنىم، كەيىن كەلىن بولعان شاعىم جانە بالالى بولعان كەز بەينەلەنگەن. ءارى قاراي قىزىمنىڭ ءار قادامىن قالت جىبەرمەۋگە تىرىستىم. تۇيىندەۋ ءۇشىن سۇلۋ قالىڭدىقتى بەينەلەدىم. قىزىمنىڭ بولاشاعى جارقىن بولسىن، باعى جانسىن دەگەن نيەتپەن مايلى بوياۋمەن سالدىم، - دەيدى شەبەر.
جاۋىرىنعا سالىنعان ءار سۋرەتتىڭ ۋاقىت پەن شەبەرلىكتى قاجەت ەتەتىنى كورىنىپ تۇر. سەبەبى گۇلدانا سەرىك قىزى الدىمەن سۇيەكتى دايىنداپ، وڭدەپ العان. تەحنولوگياسىنا ۇڭىلسەك، سۇيەكتى قايناتىپ، مايىنان، ارتىق ەتى مەن سىڭىرىنەن ارىلتادى. كەيىن ەكى كۇن بويى كەپتىرىپ، تازارتادى. قۇرعاق ءارى تازا سۇيەككە سۋرەت سالۋ دا وڭاي شارۋا ەمەس. سۇيەككە سۋرەتتى قارىنداشپەن سالىپ، كەيىن ۇستىنەن باستىرادى.
- جاۋىرىن وتە جۇقا سۇيەك. سوندىقتان ادام بەينەلەنسە الدىمەن باسىنان باستاپ سالامىز، كەيىن سۇيەك قىزسا اياعىنا ويىسامىز. وسىلايشا قىزىپ كەتپەۋىن قاداعالايمىز. سۇيەك وتە نازىك، ول مورت سىنۋى مۇمكىن. ەگەر سۋرەت كۇردەلى، ەلەمەنتتەرى كوپ بولسا، جۇمىس بىرنەشە كۇنگە سوزىلادى. ءوزىم ەڭ الدىمەن كارى جىلىكتى كادەگە جاراتىپ كوردىم. كەيىن اۋىلداعى اناما حابارلاسىپ، كارى جىلىك كەرەك دەپ ايتتىم. ول قوراپقا قۇيىمشاق، جاۋىرىن، جامباس، مويىن ومىرتقا دا سالىپ جىبەرگەن. سودان تەك كارى جىلىك ەمەس، وزگەلەرىن دە وڭدەۋ تۋرالى وي كەلدى. تەحنولوگياسىن ەشكىم ۇيرەتپەدى، ءوزىم ىزدەنىپ، قيالعا بەرىلىپ، جاڭا دۇنيە جاساپ شىعاردىم، - دەدى ول.
سونىمەن بىرگە گۇلدانا سەرىك قىزى اسىققا دا سۋرەت سالىپ، بەزەندىرەدى. ول ءۇشىن ءىرى قارا مەن ۇساق مالدىڭ اسىعىن پايدالانعان. تەك ءوزى عانا ەمەس، وقۋشىلارى دا وسى ونەرگە قۇشتار. ولاردىڭ قولىنان شىققان بۇيىمدار ءقازىر سۇرانىسقا يە.
- بالالار اسىققا قىزىقسا ەكەن دەگەن تىلەكپەن اسىقتى وڭدەپ، ويىن تۇرلەرىن تۇسىندىرەمىز. سونىمەن بىرگە مويىنومىرتقا دا تازارتىلىپ، «جاڭا تۋعان نارەستەنىڭ موينى تەز قاتايسىن» دەگەن تىلەكپەن ىلىنەتىنىن ايتامىز. ال كارى جىلىكتى «بوساعامىز بەرىك بولسىن، بالە- جالادان ساقتاسىن» دەپ ىلەدى. ول تۋرالى كوپ ىزدەنىپ، وقىدىم. اڭىز اڭگىمەلەر دە بار، - دەيدى گۇلدانا سەرىك قىزى.
اقتوبە وبلىسى بايعانين اۋدانى بۇلاقتىكول اۋىلىندا دۇنيەگە كەلگەن گۇلدانا الدىمەن كوللەدج، كەيىن ۋنيۆەرسيتەتتە «ديزاين- گرافيكا»، «بەينەلەۋ ونەرى جانە سىزۋ» ماماندىقتارى بويىنشا وقىپ، ديپلوم الدى. ارناۋلى ورتا جانە جوعارى وقۋ ورىندارىندا ءبىلىم الىپ جۇرگەن كەزدە ءتۇرلى كورمەلەرگە قاتىسىپ، سۋرەتتەرىن كوپشىلىك نازارىنا ۇسىنادى. اقتوبە قالاسىنىڭ «تۋعان جەرىم - نۇرلى ەلىم» اتتى كۇندەرى اياسىندا «دالا بوياۋلارى» تاقىرىبىندا جەكە كورمە دە وتكىزدى. ءبىراز جىلدان بەرى جيعان-تەرگەنى اۋدانداعى ەكى مۋزەيدە ساقتاۋلى تۇر. كەيدە قايىرىمدىلىق اۋكسيوندارىنا قاتىسىپ، تۋىندىلارىن ساتۋعا شىعارادى. بايعانين اۋداندىق شىعارماشىلىق ورتالىعى ديزاين ۇيىرمەسىنىڭ جەتەكشىسى بۇگىندە بار بىلگەنىن شاكىرتتەرىمەن ءبولىسىپ كەلەدى.
