ءسىزدىڭ زەينەتاقىڭىز قايتا ەسەپتەلدى: ۇلتتىق بانك قازاقستاندىقتارعا ەسكەرتۋ جاسادى

استانا. KAZINFORM - ۇلتتىق بانك زاماناۋي سيفرلىق تەحنولوگيالار مەن الەۋمەتتىك ينجەنەريا ادىستەرىن پايدالانا وتىرىپ، ەگدە جاستاعى ازاماتتارعا قارسى باعىتتالعان الاياقتىق ارەكەتتەردىڭ جيىلەپ بارا جاتقانىنا نازار اۋدارادى.

- الاياقتار پسيحولوگيالىق قىسىم مەن مانيپۋلياتسيا ءادىسىن قولدانىپ، شاتاستىرۋ ءۇشىن ءتۇرلى سەناريلەردى بەلسەندى قولدانادى. ادەتتە، الاياقتار وقىستان ارەكەت ەتەدى: قوڭىراۋ شالادى نەمەسە حابارلاما جىبەرەدى، اڭگىمە ايتقاندا تاباندىلىق تانىتادى، ادامدى ەموتسيالىق تەپە-تەڭدىكتەن شىعارۋعا جانە ويلانباي شەشىم قابىلداۋعا ماجبۇرلەۋ ءۇشىن قىسىم كورسەتەدى، - دەلىنگەن ۇلتتىق بانك حابارلاماسىندا.

الداۋدىڭ مىناداي سحەمالارى ءجيى قولدانىلادى:

وزدەرىن زەينەتاقىنى «قايتا ەسەپتەپ» بەرەتىن نەمەسە قوسىمشا تولەمدەردى ۋادە ەتەتىن زەينەتاقى قورىنىڭ قىزمەتكەرلەرى دەپ تانىستىرادى؛

وزدەرىن جيناقتاردى كوبەيتۋ نە سىياقى تولەۋ بويىنشا «ءتيىمدى» ۇسىنىستارى بار ساقتاندىرۋ كومپانيالارىنىڭ وكىلدەرى رەتىندە تانىستىرادى؛

ءبىر كەزدەرى دارىلىك زاتتار ساتىپ الىنعان جوسىقسىز كومپانيانى سوتقا بەرگەنىن جانە ولاردان وتەماقى الاتىنىن حابارلايدى، سوعان وراي دەربەس دەرەكتەردى بەرۋدى جانە قارجىلىق وپەراتسيالاردى جۇزەگە اسىرۋدى سۇرايدى؛

تۋىستارىنىڭ ويدان شىعارىلعان پروبلەمالارى (اپات، قيىندىقتار) تۋرالى حابارلاپ، وقىس وقيعالاردى ويلاپ تابادى جانە اقشانى كۋرەرگە شۇعىل بەرۋدى تالاپ ەتەدى؛

وزدەرىن قۇقىق قورعاۋ ورگاندارىنىڭ نەمەسە ۇلتتىق بانكتىڭ قىزمەتكەرى دەپ تانىستىرىپ، جىلجىمايتىن مۇلىكتى ساتۋعا جانە اقشانى ءىس جۇزىندە الاياقتارعا تيەسىلى «قاۋىپسىز شوتتارعا» اۋدارۋعا كوندىرەدى.

ۇلتتىق بانك ەگدە جاستاعى ازاماتتاردىڭ تۋىستارى مەن قامقورشىلارىنا موبيلدىك قۇرىلعىلاردا بەلگىسىز نومىرلەردى بۇعاتتاۋ فۋنكتسياسىن ورناتۋعا كومەكتەسۋدى، سونداي-اق كۇماندى سىلتەمەلەر بويىنشا وتۋدەن باس تارتۋ، بەلگىسىز فايلداردى اشپاۋ جانە كۇماندى قوسىمشالاردى ورناتپاۋ قاجەت ەكەنىن ۇنەمى ەسكەرتۋدى ۇسىنىپ وتىر.

- سونداي-اق موبيلدى بانكتىك قوسىمشالاردا (وسىنداي فۋنكسيا بار بولعان كەزدە) سەنىمدى تۇلعانىڭ كۇماندى قارجىلىق وپەراتسيالاردى راستايتىن نەمەسە قابىلدامايتىن باپتاۋ ۇسىنىلادى، بۇل قوسىمشا قورعاۋ دەڭگەيىن قوسادى.

قازاقستان ۇلتتىق بانكى ازاماتتاردى سيفرلىق سەرۆيستەر مەن قاشىقتان كورسەتىلەتىن قىزمەتتەردى پايدالانا وتىرىپ، قارجىلىق وپەراتسيالاردى جاساۋ كەزىندە قىراعى بولۋعا شاقىرادى. كۇمان تۋىنداعان جاعدايدا كونسۋلتاتسيا الۋ ءۇشىن ەكىنشى دەڭگەيلى بانكتەرگە نەمەسە قازاقستان رەسپۋبليكاسىنىڭ قۇقىق قورعاۋ ورگاندارىنا جۇگىنۋ قاجەت. قوسىمشا اقپارات الۋ ءۇشىن 1477 قىسقا ءنومىرى بويىنشا ۇلتتىق بانكتىڭ بايلانىس ورتالىعىنا حابارلاسۋعا بولادى، - دەلىنگەن بانك حابارلاماسىندا.

ايتا كەتەلىك ساۋدا مينيسترلىگى جالعان اقپارات تاراتاتىن الاياقتاردان ساق بولۋعا شاقىردى.