ءۇندىستانداعى اۋە كۇشتەرىنىڭ اۆياشوۋىندا 5 ادام قازا تاۋىپ، 100 ادام اۋرۋحاناعا ءتۇستى
استانا. KAZINFORM - ءۇندىستان اسكەري-اۋە كۇشتەرىنىڭ اۋەدەگى مۇمكىندىگىن تاماشالاۋعا ارنالعان اۆياشوۋ جوعارى تەمپەراتۋرا مەن ادامداردىڭ كوپ جينالۋىنا بايلانىستى قايعىلى اياقتالدى.
جەرگىلىكتى بيلىك ادامداردىڭ كوپتەپ اۋرۋحاناعا ءتۇسۋى مەن ولىمىنە نەگىزگى سەبەپتى سۋدىڭ جوقتىعىمەن بايلانىستىرىپ وتىر. بۇل تۋرالى ANI اگەنتتىگى جازدى.
جەكسەنبىدە تاميل نادۋ شتاتىنىڭ چەنناي قالاسىنداعى مارينا-بيچ جاعاجايىندا ءۇندىستان اۋە كۇشتەرىنىڭ 92 جىلدىعىنا ارنالعان اۋە شوۋىن تاماشالاۋعا شامامەن 15 مىڭ ادام جينالدى. اۆياشوۋ ساعات 11.00 دە باستالىپ، 13.00 گە دەيىن جالعاسقان.
پوليتسەيلەردىڭ ايتۋىنشا، ادامداردىڭ تۇنشىعىپ، ەسىن جوعالتۋىنا شوۋدى تاماشالاۋعا كەلگەن حالىقتىڭ كوپتىگى جانە ۇيىمداستىرۋ جۇمىستارىنىڭ تومەن بولۋى بىردەن-ءبىر سەبەپ بولعان.
- قاتتى ىستىقتان، ادامنىڭ كوپتىگىنەن اۋا جەتپەي السىرەگەن 10 ادام ەسىنەن تانىپ قالعان. ولارعا مەملەكەتتىك مەكەمەدە كومەك كورسەتىلدى، - دەدى پوليتسيا وكىلى.
جالپى سانى اتالعان ءىس-شارا كەزىندە 230 ادام ەسىنەن تانىپ قالعان. سونداي-اق 5 كورەرمەن كوز جۇمىپ، 100 گە جۋىق ادام اۋرۋحاناعا جەتكىزىلگەنى بەلگىلى بولدى.
ايتا كەتەيىك، بۇل - ءۇندىستان اۋە كۇشتەرىنىڭ دەليدەن تىس جەردە ءۇشىنشى رەت، وڭتۇستىك ءۇندىستاندا ءبىرىنشى رەت اۋە شوۋىن وتكىزۋى. 2023-جىلدىڭ قازان ايىندا اسكەري-اۋە كۇشتەرى پراياگراجدا جانە 2022-جىلى چانديگارحتا اۋە شوۋىن وتكىزگەن ەدى.
ەسكە سالساق، بۇعان دەيىن ءۇندىستاندا فەستيۆال كەزىندە 46 ادامنىڭ سۋعا باتىپ كەتكەنىن جازعان ەدىك.
