ءۇندىستان مەن پاكىستان اۋماعىنداعى قازاقستان ازاماتتارى كوشىرىلە مە - مينيسترلىك جاۋابى

استانا. KAZINFORM - ق ر سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين ءۇندىستان مەن پاكىستان اۋماعىنداعى قازاقستان ازاماتتارىن قاۋىپسىز جەرگە كوشىرۋگە قاتىستى تۇسىنىك بەردى.

ونىڭ ايتۋىنشا، ءۇندىستان مەن پاكىستان اراسىنداعى شيەلەنىس تاياۋ ارادا شەشىلۋى مۇمكىن.

- وسى قاقتىعىس تەك بەيبىتشىلىك ءارى ديپلوماتيالىق تاسىلدەرمەن توقتايدى دەپ ۇمىتتەنەمىز… جويقىن سوعىسقا بارمايدى دەپ ويلايمىز، - دەدى ا. راحمەتۋللين.

سونىمەن قاتار ول اتالعان ەكى ەلدىڭ اۋماعىندا جۇرگەن قازاقستان ازاماتتارىنا قاتىستى پىكىر ايتتى.

- وسى ەلدەردەگى ەلشىلىكتەر ءبىزدىڭ ازاماتتارمەن تۇراقتى بايلانىستا… قازىر ولاردى جاپپاي كوشىرۋدىڭ قاجەتتىلىگى جوق. ەگەر قاجەت بولسا، ءبىز الدىن الا ەسكەرتەمىز. يسلامابادتاعى (پاكىستان) جانە نيۋ- دەليدەگە (ءۇندىستان) ەلشىلىكتەر بۇل جاعدايدى تاۋلىك بويى زەردەلەپ وتىر، ياعني بىزگە ونداعى احۋالدى بايانداپ جاتىر. ءبىزدىڭ ازاماتتاردى ەۆاكۋاتسيالاۋعا ەشقانداي سەبەپ جوق، - دەدى ق ر سىرتقى ىستەر ءمينيسترىنىڭ ءبىرىنشى ورىنباسارى.

ەستەرىڭىزگە سالا كەتەيىك، پاكىستان ءۇندىستاننىڭ سوققىلارى بەيبىت اۋىلدار مەن مەشىتتەرگە ءتيىپ، 26 ادام قازا تاپقانىن مالىمدەدى. كوز جۇمعاندار ىشىندە بالالار دا بار. قازىر قازا تاپقاندار سانى 31 ادامعا جەتتى، ال 57 ادام جاراقات الدى.

بۇعان دەيىن ءۇندىستان پاكىستان باقىلاۋىنداعى دجاممۋ جانە كاشمير ايماقتارىنا سوققى بەرگەنىن جانە بۇل اۋماقتاردا ءۇندىستانعا قارسى لاڭكەستىك شابۋىلدار جوسپارلانىپ، باسقارىلعان «تەرروريستىك ينفراقۇرىلىم» ورنالاسقانىن مالىمدەگەن ەدى.

ءۇندىستان پاحالگامداعى تەراكتىدەن كەيىن پاكىستانعا قارسى شارالار جاريالادى.

ايتا كەتەيىك، 30-ساۋىردە ءۇندىستان مەن پاكىستان شەكاراسىندا اتىس بولعانى تۋرالى حابارلاعان ەدىك.

ءۇندىستان مەن پاكىستان سوققىلارىن كۇشەيتە ءتۇستى.

جاقىندا پاكىستاننىڭ قورعانىس ءمينيسترى حاۆادجا مۇحامماد اسيف ءۇندىستان مەن پاكىستان اراسىنداعى شيەلەنىستىڭ ارتۋى يادرولىق سوعىس قاۋپىن تۋدىرىپ وتىرعانىن مالىمدەدى.