ءۇندىستان پاكىستان تاراپىنان اتىستى توقتاتۋ رەجيمىنىڭ بۇزىلعانىن مالىمدەدى
استانا. KAZINFORM - سوڭعى بىرنەشە ساعات ىشىندە ءۇندىستان پاكىستانمەن اراداعى اتىستى توقتاتۋ تۋرالى كەلىسىمنىڭ بۇزىلعان بىرنەشە جاعدايىن تىركەدى، دەپ حابارلايدى ت ا س س.
بۇل تۋرالى ءۇندىستان سىرتقى ىستەر ءمينيسترىنىڭ ءبىرىنشى ورىنباسارى ۆيكرام ميسري بريفينگتە مالىمدەدى. ول يسلامابادتى كەلىسىمدى ساقتاۋعا شاقىردى.
- سوڭعى بىرنەشە ساعات ىشىندە ءۇندىستان مەن پاكىستاننىڭ اسكەري وپەراتسيالارىنا جاۋاپتى قولباسشىلار وسى كەشتە قول جەتكىزگەن كەلىسىمدى بىرنەشە رەت بۇزۋ جاعدايى تىركەلدى.
ءبىز پاكىستاندى بۇل بۇزۋشىلىقتاردى جويۋ ءۇشىن ءتيىستى شارالار قابىلداۋعا جانە جاعدايعا بايىپتى ءارى جاۋاپكەرشىلىكپەن قاراۋعا شاقىرامىز، - دەپ اتاپ ءوتتى ديپلومات.
بۇعان دەيىن نيۋ-دەلي مەن يسلاماباد اتىستى توقتاتۋ رەجيمى جونىندە كەلىسىمگە كەلگەن بولاتىن.
ميسريدىڭ ايتۋىنشا، جەرگىلىكتى ۋاقىت بويىنشا ساعات 15:35 تە پاكىستان قارۋلى كۇشتەرىنىڭ قولباسشىسى ءۇندىستان قارۋلى كۇشتەرىنىڭ قولباسشىسىنا تەلەفون شالعان. اسكەري كەلىسسوزدەر ناتيجەسىندە «ەكى تاراپ تا قۇرلىقتا، اۋەدە جانە تەڭىزدە بارلىق اتىس پەن اسكەري ارەكەتتەردى ءۇندىستاندىق ستاندارتتى ۋاقىت بويىنشا ساعات 17:00 دەن باستاپ توقتاتۋعا كەلىستى» دەدى ميسري.
الايدا وسى كەلىسىمنەن بىرنەشە ساعات وتكەن سوڭ دجاممۋ مەن كاشميردىڭ بىرنەشە قالاسىندا، سونداي-اق پەندجاب شتاتىندا دروندار بايقالىپ، اۋە شابۋىلىنا قارسى قورعانىس جۇيەلەرى ىسكە قوسىلدى، ەلەكتر جارىعى اجىراتىلدى.
ايتا كەتەلىك ترامپ ءۇندىستان مەن پاكىستان بىتىمگە كەلگەنى تۋرالى حابارلاعان ەدى.
