ءماجىلىس دەپۋتاتى جەتىسۋ تۇرعىندارىنىڭ وتىنىشتەرىن باقىلاۋعا الدى

استانا. KAZINFORM - دەپۋتاتتاردىڭ ايماقتارعا ساپارى جالعاسىپ جاتىر. ماجىلىسمەن رۋسلان قوجاسبايەۆ «امانات» پارتياسى جەتىسۋ وبلىسى بويىنشا فيليالىنىڭ قوعامدىق قابىلداۋ بولمەسىندە ازاماتتاردى قابىلدادى. بۇل تۋرالى ءماجىلىستىڭ باسپا ءسوز قىزمەتى مالىمدەدى.

قابىلداۋ بارىسىندا وبلىس تۇرعىندارى دەپۋتاتقا الەۋمەتتىك قامسىزداندىرۋ، ءبىلىم بەرۋ، كوممۋنالدىق شارۋاشىلىق، جول قۇرىلىسى جانە باسقا دا ماسەلەلەردى كوتەردى. تالدىقورعان قالاسىنىڭ كاسىپكەرى ەرلىك بەيبىت ۇلى ەكى جىلدان استام اعاش وڭدەۋ كاسىبىمەن اينالىسىپ كەلەدى. ەندى ونى كەڭەيتىپ، جاڭا قۇرال-جابدىقتار الۋدى جوسپارلاپ وتىر. كاسىپكەرلەردى قولداۋدىڭ مەملەكەتتىك باعدارلاماسى بويىنشا 5 ميلليون تەڭگە وتەۋسىز گرانت الۋ ءۇشىن بيزنەس-جوسپار دايىنداعان. ءبىراق كوميسسيا قۇرامىندا ءتيىستى ماماندار بولماعاندىقتان ونى قورعاي الماعان.

- گرانتتاردى ءبولۋ ەرەجەلەرى ۋاقىت تالابىنا ساي بولۋعا ءتيىس. بۇل ماسەلەنى ۇلتتىق ەكونوميكا مينيسترلىگىمەن بىرلەسىپ زەردەلەۋ قاجەت. سوندا مۇمكىندىگىنشە شاعىن بيزنەس تەگىن گرانتتاردى پايدالانا الادى، - دەدى رۋسلان قوجاسبايەۆ.

بۇل رەتتە دەپۋتات بيزنەستى قولداۋ بويىنشا باسقا دا ءبىرقاتار مەملەكەتتىك باعدارلاما بار ەكەنىن ەسكە سالدى. ماسەلەن، «دامۋ» قورى ارقىلى، «بيزنەستىڭ جول كارتاسى»، «ۇلتتىق كاسىپكەرلىكتى دامىتۋ جوباسى» جانە باسقالار. الەۋمەتتىك قورعاۋ ماسەلەسى دە كوتەرىلدى. تالدىقورعان قالاسىنداعى «اسار» دەنە شىنىقتىرۋ-ساۋىقتىرۋ ورتالىعىنىڭ باسشىسى ەلدوس بايالىشبايەۆ كوپپاتەرلى تۇرعىن ۇيلەردى ەرەكشە قاجەتتىلىكتەرى بار ادامدار ءۇشىن بەيىمدەۋدىڭ، اتاپ ايتقاندا، كىرەبەرىس ەسىك، بالكون، اس ۇيگە ارنالعان ارنايى قۇرىلعىلارمەن جابدىقتاۋدىڭ ماڭىزدىلىعىنا نازار اۋداردى.

بۇل رەتتە رۋسلان قوجاسبايەۆ قولجەتىمدى ورتانى قۇرۋ بويىنشا «كەدەرگىسىز كەلەشەك» پارتيالىق جوباسىنا توقتالدى. قازىرگى تاڭدا اكىمدىك جەتىسۋ وڭىرىندە 2021-2023 -جىلدار ارالىعىندا بەيىمدەۋ جوسپارلانعان 410 الەۋمەتتىك نىساننىڭ 382-سىندە بەيىمدەۋ شارالارىن جۇرگىزدى.

- قولجەتىمدىلىك ستاندارتتارى ازىرلەنبەي تۇرىپ سالىنعان ۇيلەر بارىن، ليفت نەمەسە پاندۋس ورناتۋ مۇمكىن ەمەس جەرلەر دە بار ەكەنىن ۇمىتپاعان ءجون. ەندى ءبىزدىڭ مىندەتىمىز - ءاربىر قۇرىلىس كومپانياسى بارلىق تەحنيكالىق ستاندارتقا ساي بولۋى ءۇشىن ازىرلەۋشىلەردى قاداعالاۋ. بارلىق ناقتى فاكتىنى جەرگىلىكتى اتقارۋشى ورگاندارعا جولدايمىن، انىقتالعان بۇزۋشىلىقتار جاقىن ارادا جويىلۋعا ءتيىس، - دەدى دەپۋتات.

جەتىسۋ وڭىرىندەگى «امانات» پارتياسىنىڭ قوعامدىق قابىلداۋ بولمەلەرىنە بارلىعى 2024 -جىلدىڭ باسىنان بەرى 1500 گە جۋىق ارىز-شاعىم تىركەلىپ، ولاردىڭ باسىم بولىگى وڭ شەشىمىن تاپقان.