ءدىني باسقارما مۇسىلماندار اراسىندا ىرىتكى سالعىسى كەلگەن ازاماتتىڭ كەشىرىم سۇراۋىن تالاپ ەتتى
قازاقستان مۇسىلماندارى ءدىني باسقارماسى قوعامدا بۇلىك پەن الاۋىزدىق تۋدىرعان ازاماتتاردىڭ ۇستىنەن سوتقا شاعىم تۇسىرەتىنىن ءمالىم ەتتى، دەپ حابارلايدى Kazinform.
ءدىني باسقارمانىڭ مالىمەتىنشە، الەۋمەتتىك جەلىدە سەرىك رىسجانوۆ ەسىمدى ازامات قاسيەتتى قۇراندا اشىق باياندالعان اياتتاردى جوققا شىعارىپ، مۇسىلماندار اراسىندا الاۋىزدىق تۋدىرعان.
«دالىرەك ايتقاندا، س. رىسجانوۆ «Barys media» يۋتۋب ارناسىنا بەرگەن سۇحباتىنىڭ بىرىندە: «قۇراندا بەس ۋاقىت ناماز وقىڭدار دەپ ايتىلماعان» دەدى.. س. رىسجانوۆ ءوزىنىڭ ارنايى ءدىني ءبىلىمىنىڭ بولماعانىنا قاراماستان، قۇراندى ءوز بەتىنشە ءتۇسىنىپ، مۇسىلمان جاماعاتىنىڭ ءدىني سەنىمىنە سىزات ءتۇسىرىپ، ىرىتكى سالعاندىعى ءۇشىن مۇسىلمان قاۋىمىنان كەشىرىم سۇراۋى ءتيىس»، - دەلىنەدى ق م د ب- نىڭ حابارلاماسىندا.
وسىعان وراي، ءمۇفتيات مۇنداي شەكتەن شىعۋشىلىققا، ءدىني قۇندىلىقتاردى تەرىس بۇرمالاۋشىلىققا، پارىزدار مەن ءدىني راسىمدەردى جوققا شىعارىپ، قوعامدا بۇلىك پەن الاۋىزدىق تۋدىرعان ازاماتتاردىڭ ۇستىنەن سوتقا شاعىم تۇسىرەتىنىن مالىمدەدى.
