ءدىني الاۋىزدىقتى قوزدىردى: جەتى جىل بۇرىن ەلدەن قاشقان كۇدىكتى رەسەيدەن قايتارىلدى
استانا. KAZINFORM - قازاقستان مەن رەسەي قۇقىق قورعاۋ ورگاندارى وتكىزگەن بىرلەسكەن ءىس-شارا ناتيجەسىندە ءدىني الاۋىزدىقتى قوزدىرعانى ءۇشىن ىزدەۋدە جۇرگەن قازاقستان ازاماتى رەسەيدەن قايتارىلدى.
كۇدىكتى 2016-2017 -جىلدارى الماتى قالاسىندا بىرنەشە رەت ءدىني الاۋىزدىقتى قوزدىرۋعا، ازاماتتاردىڭ ءدىني سەزىمىن قورلاۋعا، ازاماتتاردىڭ دىنگە دەگەن كوزقاراسى نەگىزىندە ولاردىڭ ەكسكليۋزيۆتىلىگىن، ارتىقشىلىعىن جانە كەمىستىگىن ناسيحاتتاۋعا باعىتتالعان ارەكەتتەر جاساعان.
بۇل قىلمىستىڭ وزگە دە قاتىسۋشىلارى ءارتۇرلى جاۋاپتىلىققا تارتىلدى، ال كۇدىكتى قىلمىس جاساعاننان كەيىن بوي تاسالاپ، حالىقارالىق ىزدەۋگە جاريالاندى.
وسىدان كەيىن 2017 -جىلى كۇدىكتى ماسكەۋدە قاراقشىلىق جاساپ، سوتتالعان.
رەسەيدە جازاسىن وتەگەننەن كەيىن اتالعان ادام قىلمىستىق جاۋاپكەرشىلىككە تارتۋ ءۇشىن قازاقستانعا قايتارىلدى.
قازىرگى ۋاقىتتا كۇدىكتى تەرگەۋ يزولياتورىنا قامالعان.
اتالعان قىلمىستى جاساعانى ءۇشىن بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
اۆتور
جانات قاپالبايەۆا
