ءبىر توپ جاس وسپىرىم وقۋشىنى سوققىعا جىعىپ، ونى ۆيدەوعا تۇسىرگەن
استانا. KAZINFORM - ەلوردا مەكتەپتەرىنىڭ بىرىندە وقۋشىنى ۇرىپ-سوعۋ فاكتىسى انىقتالدى. وقيعا 4-قىركۇيەكتە بولعان.
جەلىدە جاريالانعان ۆيدەودان ءبىر توپ وقۋشىنىڭ جاس ءوسپىرىمدى بۇرىشقا تاقاپ قويىپ، ۇرىپ-تەۋىپ جاتقانىن بايقاۋعا بولادى.
جازبا اۆتورىنىڭ ايتۋىنشا، جاسوسپىرىمگە كۇش كورسەتۋ ەلورداداعى № 83-مەكتەپ-گيمنازيادا بولعان.
سونداي-اق، بۇزاقىلار باسقا وقۋشىلارعا دا كۇن كورسەتپەيتىنى ايتىلعان.
ءىستىڭ ءمان-جايىن قالالىق ءبىلىم باسقارماسىنان سۇراعان ەدىك.
«اتالعان جاعداي 4-قىركۇيەكتە بولعان. بۇگىندە بۇزاقىلاردىڭ كىم ەكەنى انىقتالدى. مەكتەپ باسشىلىعى ءتارتىپ ساقشىلارىمەن بىرلەسىپ بالالار جانە ولاردىڭ اتا-اناسىمەن ءتۇسىندىرۋ جۇمىسىن جۇرگىزدى. سونىمەن قاتار وقۋشىلاردان سۇراۋ الىنىپ، ولار مەكتەپىشىلىك باقىلاۋعا قويىلدى»، - دەگەن جاۋاپ الدىق باسقارمانىڭ باسپا ءسوز قىزمەتىنەن.
ايتا كەتسەك، بيىل استاناداعى ءبىلىم بەرۋ ۇيىمدارىندا بۋللينگكە قارسى باعدارلاما ىسكە قوسىلدى.
ەسكە سالا كەتەيىك، ەلىمىزدەگى سۋيتسيد، بۋللينگ، ۇرىپ- سوعۋدان ايەلدەر مەن بالالاردى قورعايتىن زاڭناما قالاي وزگەرگەنىن جازعان ەدىك.
اۆتور
داۋلەت ىزتىلەۋ
