ءبىر قولى مەن ءبىر اياعى جوق پاراسپورتشى بالقاش كولىن ءجۇزىپ ءوتتى
قاراعاندى. قازاقپارات - 27 جاستاعى پاراسپورتشى اقنازار مۇتالىپوۆ 8-شىلدە كۇنى بالقاش كولىن ءبىر جاعالاۋىنان ەكىنشى جاعالاۋىنا دەيىن توقتاۋسىز ءجۇزىپ ءوتىپ، 20 شاقىرىمدىق ارالىقتى 13 ساعاتتا ەڭسەردى.
اقنازار ءبىر قولى مەن ءبىر اياعى جوق ادامنىڭ دا شەكسىز قاشىقتىقتى باعىندىرا الاتىنىن دالەلدەۋدى كوزدەگەن.
- مەن بۇل ءجۇزۋ ارقىلى ەڭ الدىمەن وزىمە، ودان كەيىن بۇكىل الەمگە ادامنىڭ ءبىر قول، ءبىر اياقسىز دا كەز كەلگەن كەدەرگىنى ەڭسەرە الاتىنىن دالەلدەگىم كەلدى. ارينە، مەن الەمدىك رەكورد ورناتقىم كەلەدى، - دەپ جازدى سپورتشى.
قازىر سپورتشى بۇل جەتىستىگىن گيننەستىڭ رەكوردتار كىتابىنا رەسمي تىركەۋ ءۇشىن دەمەۋشىلەر مەن قولداۋشىلار ىزدەپ جاتىر.
اقنازار مۇتالىپوۆ مەكتەپ بىتىرگەن سوڭ تەمىرجول سالاسىندا ەڭبەك ەتە باستايدى. الايدا 2018-جىلى وندىرىستىك جاراقات الىپ، اۋىر مۇگەدەكتىككە تاپ بولادى. وسى ساتتەن باستاپ ءومىرى كۇرت وزگەرەدى. جۇزۋگە ول بالا كۇنىنەن قىزىققان، ءبىراق كاسىبي دەڭگەيدە ەشقاشان اينالىسپاعان.
جاراقاتتان كەيىن اقنازار بالقاشتىڭ جاعاسىنا ءجيى بارىپ، سۋدا ءجۇزىپ كورە باستايدى. اۋەلگى ارەكەتتەرى وڭ ناتيجە بەرىپ، بۇل جاتتىعۋلار وعان كۇش پەن سەنىم بەرگەن. سۋدا ءوزىن ەركىن سەزىنە باستاعان. وسىدان كەيىن ول سانالى تۇردە پاراسپورتتى تاڭداپ، باسسەينگە جازىلىپ، كاسىبي جاتتىقتىرۋشىنىڭ قول استىندا جۇيەلى دايىندىققا كىرىسكەن.
اقنازاردىڭ تىنىمسىز ەڭبەگى مەن تاباندىلىعى 2024-جىلدىڭ ناۋرىز ايىندا العاشقى ناتيجەسىن بەردى. ول تارازدا وتكەن جارىستا 400 مەترگە جۇزۋدەن ءبىرىنشى ورىن يەلەندى. بۇدان سوڭ ول وزىنە جاڭا ماقسات قويعان - بۋراباي كولىن ءجۇزىپ ءوتۋ.
العاشىندا ول كولدىڭ ۇزىندىعى 2 شاقىرىم دەپ بولجاعانىمەن، ناقتى قاشىقتىق 2,5 شاقىرىم بولىپ شىقتى. ءبىراق سپورتشى بۇل مەجەنى دە ءساتتى ەڭسەرىپ، كولدى نەبارى 1 ساعاتتا ءجۇزىپ ءوتتى.
سول جىلى اقنازار قازاقستان چەمپيونى اتانىپ، 2025-جىلى سپورت شەبەرلىگىنە كانديدات اتاعىن الدى.
بالقاشتى ءجۇزىپ ءوتۋ اقنازار ءۇشىن جاي عانا سپورتتىق شىڭ ەمەس، ۇلكەن ومىرلىك بەلەس بولدى. بۇل ماقساتقا جەتۋ ءۇشىن ول بىرنەشە اي بويى ۇزدىكسىز جاتتىققانىن ايتادى. كۇندەلىكتى جاتتىعۋدى ءومىر سالتىنا اينالدىرعان. 8-شىلدە كۇنى سول دايىندىق ءوز جەمىسىن بەردى - اقنازار بالقاش كولىن ءبىر شەتىنەن ەكىنشى شەتىنە دەيىن توقتاۋسىز ءجۇزىپ ءوتتى.
وسىعان دەيىن ورالدا ارداگەر پاراسپورتشى 90 شاقىرىمدى التى كۇندە جاياۋ باعىندىرعانى جايلى جازعان بولاتىنبىز.
