ءبىر جىلدان كەيىن جەتكەن التىن: قازاق بالۋانى ازيا چەمپيونى اتاندى

استانا. KAZINFORM - گرەك-ريم كۇرەسىنەن 82 كەلىگە دەيىنگى سالماقتا قازاقستاندىق بالۋان دياس قالەنگە وتكەن جىلعى ازيا چەمپيوناتىنىڭ التىن مەدالى بەرىلدى.

سپورتتى دامىتۋ ديرەكسياسىنىڭ باسپا ءسوز قىزمەتى اتاپ وتكەندەي، ول 2023-جىلى كوكتەمدە استانادا وتكەن سارى قۇرلىق دوداسىنىڭ فينالىنا دەيىن سۇرىنبەي جەتكەن. الايدا، التىن مەدالعا تالاسقان وتانداسىمىز قىرعىزستان بالۋانى اقىلبەك تالانتبەكوۆكە 2:3 ەسەبىمەن ەسە جىبەرىپ، كۇمىس جۇلدەمەن جارىستى اياقتاعان ەدى.

ءبىراق، جارىستان كەيىن، ناقتىراق ايتساق، 2023-جىلعى 10-ساۋىردە قىرعىز سپورتشىسىنىڭ اناليزىنەن تىيىم سالىنعان پرەپارات («مەتاستەرون») انىقتالعان. ونى حالىقارالىق تەست جاساۋ اگەنتتىگى (International Testing Agency) راستادى.

ناتيجەسىندە قىرعىز سپورتشىسىنىڭ اتالعان ازيا بىرىنشىلىگىندەگى جەڭىسىنىڭ كۇشى جويىلىپ، ونى 4 جىلعا سپورتتان شەتتەتتى. وسىلايشا، التىن مەدال قايتادان قازاقستاندىق دياس قالەنگە تاپسىرىلدى.

ەستەرىڭىزگە سالا كەتەيىك، وسىعان دەيىن كۇرەس تۇرلەرىنەن 28-31-قازان كۇندەرى البانيانىڭ تيرانا قالاسىندا وليمپيادالىق ەمەس سالماقتارداعى الەم چەمپيوناتى وتەتىنى تۋرالى جازعان بولاتىنبىز.

اۆتور كۇنسۇلتان وتارباي