ءبىر جارىم عاسىردا ءبىر رەت تويلاناتىن كۋمبح مەلا كەزىندە 30 عا جۋىق ءۇندىستاندىق قايتىس بولدى

استانا. KAZINFORM - ءۇندىستاننىڭ پراياگرادج قالاسىندا ءوتىپ جاتقان كۋمبح مەلا فەستيۆالىندە بولعان ادامداردىڭ قاقتىعىسىنان 30 عا جۋىق ءۇندىستاندىق قازا تاۋىپ، 90 عا جۋىعى جاراقات الدى، دەپ حابارلايدى قازاقپارات BBC-گە سىلتەمە جاساپ.

Кумбха Мела
فوتو: bbc.com/UP Information department

ۋتتار-پرادەشتىڭ باس ءمينيسترى يوگي اديتياناتح بىرنەشە ادامنىڭ اۋىر جاراقات العانىن ايتتى.

Reuters اگەنتتىگىنىڭ حابارلاۋىنشا، 40 قا جۋىق ادامنىڭ دەنەسى توبەلەس بولعان جەردىڭ جانىنداعى اۋرۋحانا ءمايىتحاناسىنا جەتكىزىلگەن.

كۋمبح مەلا - حرامدارعا جاپپاي زيارات ەتۋ جانە وزەنگە شومىلۋ راسىمىمەن بايلانىستى يندۋيزم فەستيۆالى. ۇندىلەر كۋمبح مەلادا شومىلۋ ولاردى كۇنالاردان تازارتىپ، ءومىر مەن ءولىم تسيكلىنەن بوساتادى دەپ سەنەدى.

اتالعان فەستيۆال الەم بويىنشا ادامداردىڭ ەڭ كوپ باس قوساتىن جينالىسى سانالادى جانە ونى عارىشتان كورۋگە بولادى. بيىلعى فەستيۆال ماحا كۋمبح دەپ اتالدى. ول 144 جىلدا ءبىر رەت وتكىزىلەدى، بۇل ونى تابىنۋشىلار ءۇشىن ودان دا ماڭىزدى ەتەدى.

وقيعا جەرگىلىكتى ۋاقىت بويىنشا تۇنگى ساعات 1 مەن 2 ارالىعىندا بولدى، كەيبىر قۇلشىلىق جاساۋشىلار ءۇندىستاننىڭ ەڭ قاسيەتتى وزەنى گانگ يامۋنا مەن ميفتىك ساراسۆاتي وزەنىمەن تۇيىسەتىن جەرى سانگام نوسقا جەتۋ ءۇشىن پوليتسيا بارريكادالارىنان سەكىرىپ وتپەك بولدى.

جەرگىلىكتى ۋاقىت بويىنشا تۇسكە دەيىن 42 ميلليون قۇلشىلىق ەتۋشى پراياگراجدا شومىلۋ ءراسىمىن جاسادى. جالپى فەستيۆال باستالعاننان بەرى 200 ميلليونعا جۋىق ادام وزەنگە شومىلعان. 26-اقپانعا دەيىن وزەنگە ميلليونداعان ادام كەلەدى دەپ كۇتىلىپ وتىر.

پرەمەر-مينيستر نارەندرا مودي مەن فەدەرالدى مينيسترلەر، سونىڭ ىشىندە ىشكى ىستەر ءمينيسترى اميت شاح اتالعان ايتۋلى ءىس-شارادا قۇربان بولعانداردىڭ تۋىستارىنا كوڭىل ايتتى.

 

سوڭعى جاڭالىقتار