يزرايلدە اۋە كەڭىستىگى جابىلعالى 40 مىڭ تۋريست ەلدەن شىعا الماي قالدى
بەيرۋت. KAZINFORM - يزرايل مەن يران اراسىنداعى شيەلەنىستىڭ كۇشەيۋىنە بايلانىستى ونداعان مىڭ شەتەلدىك تۋريست يزرايلدە قالىپ قويدى، دەپ جازدى انادولى.
يزرايل اۋە كەڭىستىگى جابىلعاننان كەيىن ادامدار وڭتۇستىك كيپرگە ياحتامەن كەتە باستادى.
ءيزرايلدىڭ Haaretz گازەتىنىڭ حابارلاۋىنشا، اۋە كەڭىستىگى جابىلعان سوڭ، ەلدەن كەتكىسى كەلگەندەر ياحتا ارقىلى وڭتۇستىك كيپرگە وتە باستاعان. ەسكالاتسيادان قاشقانداردىڭ قاتارىندا شەتەلدىك تۋريستەرمەن بىرگە كەيبىر يزرايلدىكتەر دە بار.
تەل-اۆيۆ ماڭىنداعى گەرسليا تەڭىز پورتىندا كوپتەگەن ادام تەڭىز ارقىلى ەۆاكۋاتسيا تۋرالى كەلىسسوزدەر جۇرگىزگەن: ءبىرى - ەلىنە ورالعىسى كەلسە، ەندى ءبىرى - شەتەلدە جۇرگەن بالالارىن ىزدەپ بارۋعا تىرىسىپ جاتىر.
قازىرگى تاڭدا شامامەن 40 مىڭ شەتەلدىك تۋريست يزرايلدەن كەتە الماي وتىر. كەيبىرى كيپرگە تەڭىز جولىمەن جەتىپ ۇلگەردى، ءبىراق مۇنداي ساپارلار شەكتەۋلى جانە وتە قىمبات.
كىشىگىرىم ياحتالاردىڭ يەلەرى گەرسليا، حايفا جانە اشكەلون سەكىلدى جاعالاۋداعى قالالاردا ءبىر رەيستە 10 ادامنان ارتىق الىپ وتە المايدى.
الەۋمەتتىك جەلىلەردەگى ارنايى توپتار ارقىلى ۇيىمداستىرىلىپ جاتقان ەۆاكۋاتسياعا سۇرانىس وتە جوعارى. بيلەت باعاسى بىرنەشە جۇزدەن بىرنەشە مىڭ ەۋروعا دەيىن جەتكەن.
بۇعان دەيىن Haaretz گازەتى يزرايل ۇكىمەتى وتانعا ورالاتىن ازاماتتار ءۇشىن جىبەرىلگەن ۇشاقتاردى ەلدەن كەتكىسى كەلەتىندەرگە پايدالانۋعا تىيىم سالعانىن جازعان.
باسىلىمنىڭ مالىمەتىنشە، 13- ماۋسىم كۇنى يزرايلدىڭ يرانعا جاساعان شابۋىلىنان كەيىن باستالعان ەسكالاتسيا ناتيجەسىندە 100- 200 مىڭ يزرايلدىك تە شەتەلدە قالىپ، ەلگە قايتا الماي وتىر.
ەسكە سالا كەتەيىك، بۇعان دەيىن ا ق ش ەلشىلىگى ءوز ازاماتتارىن يزرايلدەن ەۆاكۋاتسيالاي الماي وتىرعانىن جازعان بولاتىنبىز.
قىتاي يزرايلدەگى ازاماتتارىن ەلدەن كەتۋگە شاقىردى.
ليتۆا ازاماتتارىن يزرايلدەن ەۆاكۋاتسيالاۋ باستالدى.
