ءامىر مايمۇراتوۆ سپورتتىق قۇزعا ورمەلەۋدەن ۇزدىك ۇشتىككە كىرۋ ءۇشىن باق سىنايدى

استانا. KAZINFORM - سپورتتىق قۇزعا ورمەلەۋدەن «جىلدامدىق» ديستسيپليناسى بويىنشا كەلەسى الەم كۋبوگىنىڭ كەزەڭى كراكوۆتا (پولشا) وتەدى.

 بۇل تۋرنير جالپى ەسەپتەگى ورىنداردى انىقتاۋدا ماڭىزدى ءرول اتقارادى. ۇزدىك ۇشتىككە كىرۋ ءۇشىن قازاقستاندىق ءامىر مايمۇراتوۆ تا باق سىنايدى. بۇل تۋرالى Olympic.kz جازدى.

قازىر بىرنەشە سپورتشى ۇزدىك ۇشتىككە كىرۋگە ۇمىتكەر رەتىندە سانالادى. بيىلعى الەم كۋبوگىنداعى ناتيجە ايىرماشىلىقتارى باسەكەنىڭ قىزا تۇسۋىنە سەبەپ بولىپ وتىر. يندونەزيا وكىلى كيرومال كاتيبين رەيتينگتە كوش باستاپ كەلەدى. ونىڭ قورجىنىندا 2380 ۇپاي بار. ودان كەيىن ا ق ش سپورتشىسى سامۋەل ۋوتسون ورنالاسقان - 2300 ۇپاي. ەكەۋى دە بيىل بىرنەشە كەزەڭدە توپ جارىپ، جالپى ەسەپتەگى جەڭىسكە باستى ۇمىتكەرلەردىڭ قاتارىنا قوسىلدى.

ۇزدىك ۇشتىكتى قىتايلىق لۋن تسزيانگو تۇيىندەپ تۇر - 1925 ۇپاي. ەگەر ول كراكوۆتا جارىستى مەرزىمىنەن بۇرىن اياقتاسا، جالپى رەيتينگتە تومەن ءتۇسۋى مۇمكىن. وعان بىرنەشە سپورتشىنىڭ جاقىنداپ قالۋى ىقتيمال. سولاردىڭ قاتارىندا ءبىزدىڭ ءامىر مايمۇراتوۆ تا بار.

بيىلعى ماۋسىمدا وليمپيادا ويىندارىنىڭ قاتىسۋشىسى ازىرگە جەڭىس تۇعىرىنا كوتەرىلە العان جوق. دەگەنمەن ول بىرتىندەپ قارقىن الىپ كەلەدى. جۋىردا ا ق ش- تىڭ دەنۆەر قالاسىندا وتكەن الەم كۋبوگىندا ءامىر التىنشى ناتيجە كورسەتتى. جالپى ول ءۇش كەزەڭگە قاتىستى. سونىمەن قاتار ونىڭ ەسەبىندە سەگىزىنشى جانە 11-ورىندار دا بار.

وتكەن جىلدىڭ سوڭىندا ءامىر مايمۇراتوۆ نەومدا (فرانسيا) وتكەن تۋرنيردە جەڭىمپاز اتانعان بولاتىن. ول كەزدە كاتيبين مەن ۋوتسوندى دا باسىپ وزعان ەدى. سوندىقتان ونىڭ الەۋەتىنە كۇمان كەلتىرۋ قيىن. بۇدان بولەك، پاريج وليمپياداسىندا قازاقستاندىق سپورتشى بەسىنشى ورىن العان ەدى، بۇل دا ونىڭ مۇمكىندىكتەرىن كورسەتەدى.

ماۋسىم ەندى ورتاسىنا تاياپ قالدى. دەمەك، ءامىر ءدال وسى كەزەڭدە بابىنا كەلىپ جاتقان بولۋى مۇمكىن. بۇعان ونىڭ ا ق ش- تاعى سوڭعى الەم كۋبوگىندا كورسەتكەن ونەرى دالەل.

جەڭىس تۇعىرىنىڭ بيىگىنە كوتەرىلۋ قيىن بولماق. سەبەبى جالپى ەسەپتە جوعارى ورىندارعا تالاساتىن سپورتشىلار جەتەرلىك. مۇندا قىتايلىق شۋوحۋن چۋ، جاپونيالىق رە وماسا، امەريكالىق زاك حاممەر، سونداي-اق ۋكراينالىقتار گريگوريي يلچيشين مەن ياروسلاۆ تكاچ بار. كراكوۆتاعى كەزەڭ تەك جۇلدەلەر ءۇشىن ەمەس، جالپى ەسەپتە شەشۋشى ءرول اتقاراتىن ماڭىزدى ۇپايلاردى دا ساراپقا سالاتىن تارتىستى دودا بولعالى تۇر.

ايتا كەتەيىك، جالپى ۇپاي كەستەسىندە قازاقستاندىقتار دا بار: بەكنۇر التىنبەكوۆ 613 ۇپايمەن 15-ورىندا، دامير توقتاروۆ 219 ۇپايمەن 37-ورىندا، جاندوس قاليباي 93 ۇپايمەن 41-ورىندا، الىشەر مۇرات 53 ۇپايمەن 51-ورىندا تۇر.

ايەلدەر اراسىندا تامارا ۇلجابايەۆا 446 ۇپايمەن 23-ورىنعا جايعاسسا، اننا باللارشينا 175 ۇپاي جيناپ، 37-ورىنعا تۇراقتادى.

ايتا كەتەيىك، الەم كۋبوگىنىڭ كەزەڭى 5-6 شىلدە ارالىعىندا وتەدى.