ءالىمحان ۇلى ناۋرىزدا شارشى الاڭعا ورالادى: بوكسشىنىڭ مەنەدجەرى مالىمدەمە جاسادى
استانا. KAZINFORM - بوكستان الەم چەمپيونى جانىبەك ءالىمحان ۇلىنىڭ مەنەدجەرى بەرىك سۇلتان بىلعارى قولعاپ شەبەرىنىڭ كەلەسى جەكپە-جەگىنە قاتىستى تاراعان اقپاراتتى جوققا شىعاردى.

ب ا ق بەتتەرىندە وتاندىق بوكسشىنىڭ كەلەسى ايقاسى وتەتىن ۋاقىت جاريالانعان ەدى. BRunch Boxing مالىمەتىنشە، IBF جانە WBO نۇسقالارى بويىنشا الەم چەمپيونى شارشى الاڭعا ناۋرىز ايىندا ورالىپ، ونىڭ ايقاسى ESPN- دەگى Top Rank كەشىنىڭ باستى وقيعاسى بولۋى ءتيىس.
سونىمەن قاتار دەرەككوز جانىبەك ناۋرىزداعى كەزدەسۋىنەن سوڭ ورتا سالماقتا WBA نۇسقاسى بويىنشا ەريسلاندي لارامەن نەمەسە 22-اقپان كۇنى كارلوس ادامەس پەن حامزا شيرازدىڭ قاي جەڭگەنىمەن بىرىكتىرىلگەن ايقاس وتكىزەتىنىن العا تارتتى.
«مەن دە سىزدەر سەكىلدى بۇل اقپاراتتى الەۋمەتتىك جەلىدەن وقىدىم. ناۋرىز ايىنداعى كەزدەسۋ بويىنشا ەشقانداي كەلىسسوز جۇرگىزىپ جاتقان جوقپىز. كۇنى مەن ورىن بەلگىلى، رەسمي كەلىسىمشارت كۇتىپ وتىرمىز. جەكپە-جەك ناۋرىزدا بولمايدى»، - دەدى بەرىك سۇلتان Tengri Sport-قا بەرگەن سۇحباتىندا.
بۇعان دەيىن جانىبەكتىڭ ءوزى دە كەلەسى ايقاسى كوكتەمدە وتەتىنىن، سونان سوڭ كۇزدە ءۇش دۇركىن الەم چەمپيونى اتانۋدى كوزدەيتىنىن العا تارتقان.