عالىمدار 4 جىل بۇرىن قايتىس بولعان كومپوزيتوردىڭ ميىنان جاڭا مي ءوسىرىپ شىعاردى
استانا. قازاقپارات - اۋستراليا عالىمدارى ا ق ش كومپوزيتورى ەلۆين ليۋسەنى قايتا «ءتىرىلتتى».
باتىس اۋستراليا ونەر گالەرەياسىندا سيمفونيانىڭ اۋەنى ەستىلەدى. ءبىراق كوزگە كورىنەتىن بىردە-ءبىر مۋزىكانت جوق. الايدا مۇقيات قاراساڭىز، مۋزىكانتتىڭ كىشكەنتاي ءبىر بولشەگىن كورۋگە بولادى. بولمەنىڭ ورتاسىندا بيىك تۇعىردىڭ ۇستىندە تۇرعان ميكروسكوپتىڭ استىندا ەكى اق ءتۇستى داق كورىنەدى - مەدۋزاعا ۇقسايتىن مينياتيۋرالى تىرشىلىك يەلەرى. بۇل - مارقۇم امەريكان كومپوزيتورى ەلۆين ليۋسەنىڭ زەرتحانادا وسىرىلگەن «ميى». ول ءدال قازىر ءتىرى پارتيتۋرا جازىپ جاتىر.
عالىمدار ءتورت جىل بۇرىن قايتىس بولعان كومپوزيتور ەلۆين ليۋسەنىڭ مي جاسۋشالارىنان مي ءوسىرىپ شىعاردى. ەندى بۇل كىشكەنە مي اينالاداعى دىبىستاردى ەستىپ، ولاردى ءتۇسىنىپ، نەيروسيگنالدار ارقىلى جاۋاپ بەرە الادى.
2021 -جىلى دۇنيەدەن وزعان ليۋسە ەكسپەريمەنتالدى مۋزىكانىڭ پيونەرى بولعان. ەندى ونىڭ مي جاسۋشالارى زاماناۋي نەيروتەحنولوگيا كومەگىمەن جاڭاشا «تىرشىلىككە» ەنىپ، شىعارماشىلىق جولىن جالعاستىرىپ جاتىر.
بۇل جوبا تەك كوركەم ەكسپەريمەنت قانا ەمەس - ول جاساندى ينتەللەكت، ادامنىڭ ميى، شىعارماشىلىق جانە اۆتورلىق قۇقىق جونىندەگى وزەكتى سۇراقتارعا جول اشادى.
مي بەلسەندى بولعان كەزدە ارنايى پلاستينالار ونىڭ سيگنالدارىن مۋزىكاعا اينالدىرادى - بۇل ەرەكشە، ءتىرى مۋزىكا، ۇنەمى وزگەرىپ تۇرادى.
جانە بۇل جاي عانا كەزدەيسوق شۋ ەمەس. مۋزىكا ليۋسە ءتىرى كەزىندە اينالىسقان دۇنيەلەرگە ۇقسايدى - دىبىس، ءدىرىل مەن كەڭىستىكتى زەرتتەگەن ەكسپەريمەنتتەر.
