ءماجىلىس بۇرالقى يتتەرگە قاتىستى زاڭعا سەنات ۇسىنعان باپتارمەن كەلىستى

- قارالىپ وتىرعان زاڭعا پارلامەنت سەناتى تاراپىنان ءبىرقاتار ناقتىلاۋشى سيپاتتاعى تۇزەتۋلەر ەنگىزىلدى. اتاپ ايتقاندا، يەسىز جانۋارلاردىڭ سانىن رەتتەۋ ماسەلەلەرى، ونىڭ ىشىندە ءتارتىبى مەن مەرزىمدەرى جەرگىلىكتى وكىلدى ورگانداردىڭ قۇزىرەتىنە بەرىلدى. مۇنىمەن قوسا، «يەسىز جانۋارلار» ۇعىمى ناقتىلاندى. جانۋارلاردى جانسىزداندىرۋ تۋرالى شەشىمدى ۆەتەريناريالىق قورىتىندى نەگىزىندە قابىلداۋ نورماسى تولىقتىرىلدى جانە وزگە دە تۇزەتۋلەر ەنگىزىلدى. جالپى العاندا، ءماجىلىس قابىلداعان زاڭنىڭ تۇجىرىمداماسى وزگەرىسسىز ساقتالادى، ەنگىزىلگەن تۇزەتۋلەر ناقتىلاۋشى سيپاتقا يە. زاڭنىڭ تۇجىرىمداماسى وزگەرمەيدى. بۇرالقى يتتەردى قايتارىمسىز اۋلاۋ مودەلى ساقتالادى جانە ونى سەنات قولدادى، - دەدى ءماجىلىس دەپۋتاتى ەربولات ساتىبالدى.

ايتا كەتەيىك، مەملەكەت باسشىسى قاسىم-جومارت كەمەل ۇلى توقايەۆ جانۋارلارعا جاۋاپكەرشىلىكپەن قاراۋ مادەنيەتىن قالىپتاستىرۋدىڭ، ءۇي جانۋارلارىنا قاتىگەزدىككە جول بەرمەۋدىڭ، سونداي-اق جانۋارلار يەلەرىنىڭ جاۋاپكەرشىلىگىن كۇشەيتۋدىڭ ماڭىزدىلىعىن ەرەكشە اتاپ ءوتتى.

- پرەزيدەنت تاپسىرماسىن ىسكە اسىرۋ ماقساتىندا جانۋارلاردى ەسەپكە الۋ ماسەلەسىن ناقتى رەگلامەنتتەۋ قاجەت. سەنات ۇسىنعان رەداكسيادا قانداي دا ءبىر قۇقىقتىق ايقىنسىزدىق بار. سوندىقتان جانۋارلاردى ەسەپكە الۋ جانە چيپتەۋ مەنشىك قۇقىعىن راستاۋدىڭ نەگىزگى ءارى ءتيىمدى تەتىگى بولۋى ءتيىس دەپ سانايمىز. قاراپايىم تىلمەن ايتقاندا، ەگەر جانۋار ەسەپكە الىنباسا - ونىڭ يەسىن انىقتاۋ مۇمكىن ەمەس، ال يەسى انىقتالماسا - جاۋاپكەرشىلىك تە بولمايدى. پرەزيدەنت تاپسىرماسىن ورىنداۋ ماقساتىندا ءماجىلىس دەپۋتاتتارى ءتيىستى تۇزەتۋلەر ازىرلەدى. اتالعان تۇزەتۋلەر جانۋارلار يەلەرىنىڭ جاۋاپكەرشىلىگىن كۇشەيتەتىن نورمالارمەن بىرگە، بۇگىن ءبىرىنشى وقىلىمدا ماقۇلدانعان «اڭشىلىق شارۋاشىلىعى جانە جانۋارلار دۇنيەسىن ساقتاۋ ماسەلەلەرى تۋرالى» زاڭ جوباسى اياسىندا قارالاتىن بولادى. جوعارىدا ايتىلعانداردى ەسكەرە وتىرىپ، ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جانۋارلارعا جاۋاپكەرشىلىكپەن قاراۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا سەنات ەنگىزگەن تۇزەتۋلەرمەن كەلىسۋدى ۇسىنادى، - دەدى دەپۋتات.

ءماجىلىستىڭ جالپى وتىرىسىندا پالاتا دەپۋتاتتارى بۇل تۇزەتۋلەرمەن كەلىستى.

ەسكە سالساق، وتكەن اپادا سەناتت «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جانۋارلارعا جاۋاپكەرشىلىكپەن قاراۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قارادى. سەناتورلار قۇجاتتىڭ جەكەلەگەن باپتارىن جاڭا رەداكسيادا ۇسىنىپ، ونى ماجىلىسكە قايتاردى.