ءابۋ-دابيدە وزبەكستاننىڭ ءۇش ازاماتى ءولىم جازاسىنا كەسىلدى

استانا. KAZINFORM - سوت لاڭكەستىك ارەكەت دەپ تانىعان امىرلىكتەردەگى يەۆرەي قاۋىمى وكىلىن ءولتىرۋ ءىسى بويىنشا ۇكىم شىقتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

دۇيسەنبى، 31-ناۋرىز كۇنى ءابۋ-دابيدەگى فەدەرالدى اپەللياتسيالىق سوت مولدوۆا ازاماتى يزرايلدىك سۆي كوگاندى ۇرلاپ ولتىرگەنى ءۇشىن ءۇش ەر ادامدى ءولىم جازاسىنا، ءتورتىنشىسىن ءومىر بويىنا باس بوستاندىعىنان ايىرۋعا ۇكىم شىعاردى.

ءبىراۋىزدان قابىلدانعان ۇكىم سوتتالۋشىلاردى تەرروريستىك نيەتپەن قاساقانا كىسى ءولتىردى دەپ ايىپتادى، دەپ حابارلايدى WAM اقپاراتتىق اگەنتتىگى.

بىرىككەن اراب امىرلىكتەرىنىڭ باس پروكۋرورى حاماد سايف ءال- ءشامسيدىڭ 2025 -جىلدىڭ قاڭتارىندا سوت تالقىلاۋىن وتكىزۋگە شاقىرعان بۇيرىعىنان كەيىن بۇل ءىس جىلدام قارالدى.

ب ا ءا مەملەكەتتىك قاۋىپسىزدىك پروكۋراتۋراسىنىڭ تەرگەۋى ايىپتالۋشىنىڭ كوگاندى نىساناعا الىپ، قاساقانا شابۋىل جاساعانىن انىقتادى. سوتقا ەلەۋلى ايعاقتار، سونىڭ ىشىندە ايىپتالۋشىنىڭ تولىق مويىنداۋى، سوت- مەديتسينالىق ساراپتاما قورىتىندىلارى، ساراپتاما ناتيجەلەرى، قىلمىس قارۋى جانە كۋاگەرلەردىڭ سوزدەرى ۇسىنىلدى.

سوت نەگىزگى ءۇش قىلمىسكەردى ءولىم جازاسىنا كەستى. ال ولارعا كومەكتەسكەن ءتورتىنشى سىبايلاسى جازاسىن وتەگەن سوڭ ەلدەن جەر اۋدارىلىپ، ءومىر بويىنا باس بوستاندىعىنان ايىرىلدى. ءباا زاڭىنا سايكەس، ءولىم جازاسىنا كەسىلگەن ۇكىمدەر اۆتوماتتى تۇردە اپەللياتسياعا بەرىلەدى جانە ونى فەدەرالدى جوعارعى سوتتىڭ قىلمىستىق ءبولىمى قارايدى.

ۇكىم شىعارىلعاننان كەيىن باس پروكۋرور ءال شامسي بۇل ۇكىم ب ا ءا- ءنىڭ ەڭ جوعارى ادىلەتتىلىك ستاندارتتارى مەن زاڭ ۇستەمدىگىنە سايكەس لاڭكەستىكپەن كۇرەسۋ، سونىمەن بىرگە ءادىل سوت كەپىلدىگىن قامتاماسىز ەتۋدەگى مىزعىماس ۇستانىمىن كورسەتەتىنىن باسا ايتتى.

ول ب ا ءا سوت جۇيەسى ۇلتتىق قاۋىپسىزدىك پەن تۇراقتىلىققا نۇقسان كەلتىرۋ ارەكەتتەرىنە تاباندى تۇردە قارسى تۇراتىنىن اتاپ ءوتتى.

سونىمەن قاتار باس پروكۋرور بىرىككەن اراب امىرلىكتەرى بىرگە ءومىر ءسۇرۋ مەن تولەرانتتىلىقتىڭ جاھاندىق ۇلگىسى بولىپ تابىلاتىنىن، وندا زاڭدار ءدىنى مەن ەتنيكالىق تەگىنە قاراماستان بارلىق تۇرعىندى قورعايتىنىن، ولاردىڭ قاۋىپسىزدىگىن قامتاماسىز ەتەتىنىن قوسا ايتتى.

ايتا كەتەيىك، 2024 -جىلدىڭ 26​-قاراشاسىندا ءباا بيلىگى يزرايل جانە مولدوۆا ازاماتى تسۆي كوگاندى ءولتىردى دەگەن ءۇش كۇدىكتىنى قاماۋعا العان بولاتىن. جوعالعان ادامنىڭ دەنەسى 24-قاراشادا ءال- اين قالاسىنان تابىلدى.

ب ءا ا- دە ءومىر سۇرگەن كوگان بۇكىل الەم بويىنشا فيليالدارى بار پراۆوسلاۆيەلىك يەۆرەي توبىنىڭ وكىلى بولدى.

يزرايل پرەمەر- ءمينيسترى بينيامين نەتانياحۋ كەڭسەسى بىردەن كوگاننىڭ ءولتىرىلۋىن ايىپتاپ، ونى «انتيسەميتتىك لاڭكەستىك ارەكەت» دەپ اتادى.

بۇعان دەيىن سۋدان ب ءا ا- گە قارسى حالىقارالىق سوتقا شاعىم تۇسىرگەنىن جازعان بولاتىنبىز.