بيىلدان باستاپ تۇقىم قۇنىن سۋبسيديالاۋدىڭ جاڭا مەحانيزمى ەنگىزىلدى

- كوكتەمگى ەگىس جۇمىستارىن ۋاقىتىلى وتكىزۋ ءۇشىن جالپى 402 مىڭ توننا جەڭىلدەتىلگەن باعاداعى ديزەل وتىنى ءبولىندى. بۇگىنگى تاڭدا ونىڭ 204,8 مىڭ تونناسى جونەلتىلدى. تۇقىم ماتەريالىنىڭ ساپاسىنا مونيتورينگ جۇرگىزۋگە ەرەكشە نازار اۋدارىلىپ وتىر. تۇقىمعا جالپى قاجەتتىلىك 2,3 ميلليون توننا. تەكسەرۋ قورىتىندىسى بويىنشا ولاردىڭ بارلىعى ەگىس ستاندارتىنىڭ 1 جانە 2 سىنىپتارىنا سايكەس كەلەدى. تۇقىم ساپاسىن قامتاماسىز ەتۋدە مەملەكەتتىك قولداۋ ماڭىزدى ءرول اتقارادى. مەملەكەت باسشىسىنىڭ تاپسىرماسىنا سايكەس، بيىلدان باستاپ تۇقىم قۇنىن سۋبسيديالاۋدىڭ جاڭا مەحانيزمى ەنگىزىلدى، - دەدى ا. سۇلتانوۆ.

اتاپ ايتقاندا، وتاندىق تۇقىمدى ساتىپ العان كەزدە سۋبسيديا كولەمى %10 عا جوعارى بولادى. بيۋدجەت شىعىسىن ازايتۋ جانە مەملەكەتتىك قولداۋ شارالارىن قىسقارتۋ ماقساتىندا بيىلدان باستاپ تۇقىم ساپاسىن مەملەكەتتىك قاراجات ەسەبىنەن تەكسەرۋ توقتاتىلدى.

- شارۋالار تۇقىم ساپاسىن ءوز قاراجاتى ەسەبىنەن تەكسەرۋى ءتيىس جانە بۇل ماسەلە مەملەكەتتىك قارجىلاندىرۋدىڭ بولماۋىنا بايلانىستى توقتاماۋى قاجەت. تۇقىم شارۋاشىلىعى سالاسىنداعى باقىلاۋدى كۇشەيتۋ ماقساتىندا قر اۋىل شارۋاشىلىعى مينيسترلىگىنىڭ مەملەكەتتىك ينسپەكتسيا كوميتەتى قۇرىلىمىندا تۇقىم شارۋاشىلىعى زاڭناماسىنىڭ ساقتالۋىن باقىلاۋ جونىندەگى جاڭا باسقارما قۇرىلدى. سونىمەن قاتار جەرگىلىكتى اتقارۋشى ورگانداردىڭ استىق جانە اسىل تۇقىمدى مال شارۋاشىلىعى ينسپەكتورلارىنىڭ قىزمەتىنە دە باقىلاۋدى كۇشەيتۋ جوسپارلانىپ وتىر. بۇل وسىمدىك شارۋاشىلىعىنىڭ نەگىزگى باعىتتارىندا باقىلاۋدى كۇشەيتىپ، سالانى دامىتۋعا باعىتتالعان مەملەكەتتىك قولداۋ شارالارىنىڭ تيىمدىلىگىن ارتتىرۋعا مۇمكىندىك بەرەدى،- دەدى ۆيتسە-مينيستر.

بۇدان بۇرىن حابارلانعانداي، اۋىل شارۋاشىلىعى ۆيتسە-ءمينيسترى ازات سۇلتانوۆ شەگىرتكە زيانكەستەرىنە قارسى حيميالىق وڭدەۋ جۇمىستارى كورشى ەلدەرمەن بىرلەسە جۇزەگە اساتىنىن ايتتى.