بيىل ينفلياتسيا قارقىنى باياۋلادى - ساراپشى قازاقستان ەكونوميكاسىنىڭ قورىتىندىسى تۋرالى

وتكەن جىلى قازاقستان ەكونوميكاسى ەنەرگەتيكالىق داعدارىس، كۇردەلى گەوساياسي جاعدايلار جانە جەتكىزۋ تىزبەگىندەگى ىركىلىستەر سىندى ءبىرقاتار كۇيزەلىسكە تاپ بولدى. ناتيجەسىندە ينفلياتسيانىڭ جىلدىق ءوسۋى 20 پايىزدان استى.

2023-جىلى ۇلتتىق بانك بىرنەشە شارا قابىلداۋعا ءماجبۇر بولدى جانە ولار ناتيجەسىن بەردى. ەكونوميكا سالاسىنداعى ساراپشى ارمان بايعانوۆ قازاقستان ەكونوميكاسىنداعى جىلدىڭ باستى وقيعالارى تۋرالى سۇحبات بەردى، دەپ حابارلايدى Kazinform.

«بيىلعى قازاقستان ەكونوميكاسىنىڭ باستى جەتىستىگى - ينفلياتسيا قارقىنىنىڭ باياۋلاۋى. قازىرگى ۋاقىتتا ينفلياتسيا دەڭگەيى 10,3 پايىز كورسەتۋدە، ال وتكەن جىلى جىلدىق ينفلياتسيا دەڭگەيى 21,3 پايىزعا جەتكەن ەدى»، - دەدى ەكونوميست ارمان بايعانوۆ.

ونىڭ ايتۋىنشا، تاعى ءبىر ماڭىزدى وقيعا - سيفرلىق ۆاليۋتانى ەنگىزۋ دەپ ساناۋعا بولادى.

«قازىر تسيفرلاندىرۋدىڭ بەلسەندى دامۋى ءجۇرىپ جاتىر، بۇل اقشا قاتىناستارىنا جاقسى اسەر ەتەدى. بيىل ۇلتتىق بانك تسيفرلىق ۆاليۋتانى تانىستىردى. ەرتەلى-كەش قازاقستاندىقتارعا سيفرلىق ۆاليۋتانى پايدالانۋ ىڭعايلى بولادى دەپ ويلايمىن. ال بۇل سىبايلاس جەمقورلىق پەن كولەڭكەلى ەكونوميكا كورسەتكىشتەرىن تومەندەتەدى»، - دەپ اتاپ ءوتتى ساراپشى.

جالپى، ەكونوميكاداعى جەتىستىكتەردى ونىڭ ءوسۋ كورسەتكىشتەرى بويىنشا باعالاۋعا بولادى.

«1- جەلتوقسانداعى جاعداي بويىنشا ەكونوميكانىڭ ءوسۋى 4,9 پايىزدى قۇرادى. وتكەن جىلى بۇل كورسەتكىش 3 پايىزدان از بولدى. بۇل رەتتە جان باسىنا شاققانداعى ج ءى ءو ورتاشا ءوسىمى وتكەن جىلمەن سالىستىرعاندا 11 پايىزعا جوعارى»، - دەپ اتاپ ءوتتى ساراپشى.

ايتا كەتەيىك، حالىقارالىق ۆاليۋتا قورى قازاقستان ەكونوميكاسىنىڭ 2023-جىلى 4,3 پايىزعا دەيىن ءوسۋىن بولجاعان بولاتىن.