بيىل وزبەكستاندا ءبىرقاتار قازاق جازۋشىسىنىڭ مەرەيتويى اتالىپ وتەدى
تاشكەنت. KAZINFORM - بيىل وزبەكستاندا قازاق جازۋشىلارىنىڭ مەرەيتويىن اتاپ ءوتۋ جوسپارلانىپ وتىر. بۇل تۋرالى وزبەكستانداعى قازاق ادەبيەتى كەڭەسىنىڭ وتىرىسىندا ايتىلدى.
بۇل تۋرالى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار حابارلادى.
جيىن بارىسىندا ادەبيەت جاناشىرلارى بىلتىر جارىق كورگەن وزبەكستانداعى قازاق قالامگەرلەرىنىڭ ەڭبەكتەرىنە توقتالدى. وتكەن جىلى جازۋشى، قازاق-وزبەك ادەبيەتىنىڭ زەرتتەۋشىسى قالدىبەك سەيدانوۆتىڭ «كوڭىلدەگى كورىكتى ويلار» كىتابى، اقىن مۇقان راحمان ۇلىنىڭ «جۇرەگىم جىر تولعايدى» اتتى جىر جيناعى باسپادان شىققان.
«2023-جىلى وزبەكستانداعى قازاق قالامگەرلەرىنىڭ، اتاپ ايتقاندا قالدىبەك سەيدانوۆتىڭ، لالا ءجۇنىس قىزىنىڭ، اقشاگۇل تولەگەنوۆانىڭ ولەڭدەرى وزبەك تىلىنە اۋدارىلىپ، «وزبەكستان - وتانىم مەنىڭ» جىر جيناعىنا ەندى. مۇنىڭ بارلىعى اتقارىلعان ۇلكەن جۇمىستاردىڭ ناتيجەسى»، - دەدى نيزامي اتىنداعى تاشكەنت مەملەكەتتىك پەدوگوگيكالىق ۋنيۆەرسيتەتىنىڭ پروفەسسورى انارگۇل قالدىبەكوۆا.
سونىمەن قاتار وتكەن جىلى وزبەكستان جازۋشىلار وداعىنىڭ مۇشەسى ابدۋللا رۇستەموۆتىڭ «حايت - مۋالليم» (ءومىر - ۇستاز) كىتابى جارىق كورگەن. بۇعان قوسا ونىڭ اۋدارماسىمەن ق ر ۇلتتىق عىلىم اكادەمياسىنىڭ اكادەميگى، تاريحشى ەرلان سىدىقوۆتىڭ «شاكارىم» اتتى مونوگرافيالىق تۋىندىسى وزبەكتىلدى وقىرمانعا ۇسىنىلدى. ال اقىن، اۋدارماشى ساپاربەك يمانبەكوۆ وزبەكستاننىڭ حالىق اقىنى ابدۋللا اريپوۆتىڭ «العاشقى ماحابباتىم» ولەڭدەر جيناعىن قازاق تىلىنە اۋداردى.
وزبەكستانداعى قازاق ادەبيەتى كەڭەسىنىڭ وكىلدەرى بيىل وزبەكستاندا جۇسىپبەك ايماۋىتوۆتىڭ 135 جىلدىعى، بەيىمبەت مايلين، ساكەن سەيفۋللين جانە ءىلياس جانسۇگىروۆتىڭ 130 جىلدىعى، بەردىبەك سوقپاقبايەۆ پەن ءابدىجامال نۇرپەيىسوۆتىڭ 100 جىلدىق مەرەيتويى اتالىپ وتەتىنىن ءمالىم ەتتى. ونىڭ بارىسىندا دوڭگەلەك ۇستەلدەر، عىلىمي-پراكتيكالىق كونفەرەنسيالار مەن ادەبي-مادەني ءىس-شارالار ۇيىمداستىرىلادى.
بىرنەشە ادەبي ەڭبەكتىڭ اۆتورى، جازۋشى احان تاشمەتوۆتىڭ ايتۋىنشا، وزبەكستانداعى قازاق قالامگەرلەرىنىڭ قاتارى جىل سايىن تولىعىپ كەلەدى.
«وزبەكستانداعى قازاق ادەبيەتىنە كورسەتىلىپ جاتقان قولداۋ ەرەكشە. كەيىنگى جىلدارى مەملەكەتارالىق بايلانىستار قارقىندى دامىپ، وزبەكستان مەن قازاقستان اراسىنداعى مادەني، رۋحاني قارىم-قاتىناس نىعايا ءتۇستى. سودان بولسا كەرەك، قازىر وزبەكستاندا قازاق قالامگەرلەرىنىڭ قاتارى ارتىپ كەلەدى. تاياۋدا عانا ارامىزداعى ءۇش ازامات وزبەكستاننىڭ جازۋشىلار وداعىنا مۇشە اتاندى. مۇنداعى قازاق قالامگەرلەرىنىڭ وزىندىك ءستيلى بار، ورتاق ادەبيەتكە قوسار ۇلەسى مول»، - دەپ تۇيىندەدى احان تاشمەتوۆ.
