بيىل وتباسىلىق-تۇرمىستا 260 اۋىر قىلمىس تىركەلدى - ەرجان سادەنوۆ
استانا. KAZINFORM — قۇقىق قورعاۋ سالاسىنىڭ باسىم باعىتتارىنىڭ ءبىرى وتباسىلىق- تۇرمىستىق زورلىق-زومبىلىقتىڭ الدىن الۋ. بۇل تۋرالى ق ر ۇكىمەتى جانىنداعى قۇقىق بۇزۋشىلىقتاردىڭ الدىن الۋ جونىندەگى ۆەدومستۆوارالىق كوميسسيا وتىرىسندا ايتىلدى.
ىشكى ىستەر ءمينيسترى ەرجان سادەنوۆ وسى سالاداعى جاعداي تۋرالى بايانداپ، بارلىق بيلىك ورگاندارى مەن قوعامدىق قۇرىلىمداردى كەشەندى كوزقاراس پەن تارتۋدىڭ ماڭىزىن اتاپ ءوتتى.
ول وسى سالادا زاڭنامالىق بازا قۇرىلعانىن ەسكە سالدى. ۇرىپ-سوعۋ جانە دەنساۋلىققا جەڭىل زيان كەلتىرۋ قىلمىستىق جاۋاپكەرشىلىككە تارتىلدى. بۇل جابىرلەنۋشىلەردى قورعاۋدى كۇشەيتۋگە مۇمكىندىك بەردى.
2024-جىلى وتاسىلىق-تۇرمىستا 260 اۋىر قىلمىس تىركەلدى (2023-جىلى - 305)، ال اسا اۋىر قىلمىستار — 170 (2023-جىلى — 134). وتباسىنداعى زورلىق-زومبىلىققا قارسى مامانداندىرىلعان بولىمشەلەر قۇرىلدى.
— جاڭا جۇمىس فورماتىنا كوشتىك. وتباسىلىق جانجالدارعا شاقىرۋ كەزىندە جابىرلەنۋشىلەرگە ساۋالناما جۇرگىزىلەدى. 26 مىڭ وتباسىنىڭ ساۋالناماسى بويىنشا 1 مىڭ قاساقانا ءزابىر كورسەتۋشى انىقتالدى. ولارمەن پسيحوكوررەكتسيالىق جۇمىس جۇرگىزىلۋدە. تۇرمىستىق زورلىق- زومبىلىققا كۋا بولعان بالالارمەن جۇمىس ىستەۋگە ەرەكشە نازار اۋدارىلادى. دەنساۋلىق ساقتاۋ، ەڭبەك جانە حالىقتى الەۋمەتتىك قورعاۋ، اعارتۋ مينيسترلىكتەرىمەن داعدارىس ورتالىقتارىنىڭ قىزمەتتەرىن الۋ بويىنشا بىرلەسكەن بۇيرىق ازىرلەندى. ورتالىقتاردا، مەكتەپتەردە، ەمحانالاردا پسيحولوگتاردىڭ دەڭگەيىن ارتتىرۋ ءۇشىن — ءى ءى م اقتوبە ينستيتۋتى زورلىق-زومبىلىقتىڭ العىشارتتارىن ەرتە انىقتاۋ بويىنشا باعدارلاما ازىرلەدى. قاراشا ايىندا اقتوبە وبلىسىنىڭ ماماندارى ءۇشىن كۋرستار وتكىزىلدى. بۇدان ءارى اكىمدىكتەردىڭ وتىنىمدەرى بويىنشا وتكىزىلەتىن بولادى. ايتا كەتەيىن، مۇندا بارلىق الدىن الۋ سۋبەكتىلەرىن تارتۋ جانە اكىمدىكتەردى ۇيلەستىرۋ تالاپ ەتىلەدى، — دەپ اتاپ ءوتتى مينيستر.
ايتا كەتەلىك، الكوگولدى شەكتەن تىس پايدالانۋ — قىلمىس دەڭگەيىنە اسەر ەتەتىن نەگىزگى فاكتورلاردىڭ ءبىرى بولىپ قالا بەرەتىنىن ق ر ءى ءى م ەرجان سادەنوۆ اتاپ وتكەنىن جازعان بولاتىنبىز.
