بيىل قوستاناي وبلىسىنا قانشا قانداسىمىز كوشىپ بارعانى بەلگىلى بولدى
بيىل قوستاناي وبلىسىنا 966 قانداس كوشىپ كەلدى، دەپ حابارلايدى Kazinform «وتانداستار قورى» ك ە ا ق باسپا ءسوز قىزمەتىنە سىلتەمە جاساپ.
بۇل بەلگىلەنگەن كۆوتادان ءۇش جارىم ەسە ارتىق. ولاردىڭ %90 رۋدنىي قالاسىنا قونىستانعان. سىرتقى ىستەر مينيسترلىگىنە قاراستى «وتانداستار» قورىنىڭ وكىلدەرى وڭىرگە جۇمىس ساپارىمەن كەلىپ، قاتارىمىزدى تولىقتىرعان اعايىننىڭ تۇرمىس-تىرشىلىگىمەن تانىسىپ قايتتى.
گۇلسينا قالمىرزايەۆا رۋدنىيعا وزبەكستاننان كوشىپ كەلدى. ول جوعارى ءبىلىمدى دارىگەر. ءبىراز جىل بويى جەرگىلىكتى اۋرۋحانادا جۇمىس ىستەدى. كەيىن جەكە لور كابينەتىن اشۋدى ۇيعاردى. ونى جابدىقتاۋ ءۇشىن مەملەكەتتەن قايتارىمسىز 5 ميلليون تەڭگە گرانت جانە 6 ميلليون تەڭگە سۋبسيديا العان. قازاقستاندا ءار ادامعا جەكە ءىسىن اشۋعا مۇمكىندىك مول ەكەنىن تىلگە تيەك ەتتى.
«وزىنە ۇنايتىن جۇمىستى دوڭگەلەتىپ اكەتەمىن دەگەن ادامعا مەملەكەت تاراپىنان بارلىق جاعداي جاسالعان. وعان كوزىم جەتتى، سەبەبى سول كومەكتەردى الىپ، كاسىبىمدى جۇرگىزىپ جاتىرمىن»، - دەيدى جەكە كاسىپكەر گۇلسينا قالمىرزايەۆا.
كەنشىلەر قالاسىنا كەلگەن قانداستارىمىز ءتۇرلى سالادا ەڭبەك ەتەدى. كوبى جەكە كاسىپپەن اينالىسادى. ءبىرى تىگىن سەحىن اشسا، ەندىبىرى تۇيە شارۋاشىلىعىن تۇلەتىپ، ايماقتى شۇباتپەن قامتاماسىز ەتىپ وتىر. ارينە ولاردى مازالايتىن ماسەلەلەر دە جوق ەمەس.
«قانداستار نەگىزىنەن قۇجات الۋ ماسەلەلەرى، ونىڭ ىشىندە ىقتيارحات، ازاماتتىق الۋ، وڭىرلىك كۆوتا بويىنشا حابارلاسادى. قۇجات الۋعا ءوتىنىش بەرىپ، ءبىراق ءالى جاۋاپ الماعاندارى دا بار. وسىنداي ماسەلەلەردىڭ ءبارى ءبىزدىڭ نازارىمىزدا»، - دەيدى «وتانداستار قورى» ك ە ا ق قانداستاردى قولداۋ دەپارتامەنتى ديرەكتورىنىڭ ورىنباسارى ەركەبۇلان مەڭلىبايەۆ.
تاريحي وتانىنا ورالعان قانداستارىمىزدىڭ تەز بەيىمدەلىپ كەتۋىنە مەملەكەت بارىنشا جاعداي جاساپ جاتىر. ازاماتتىق الۋ مەرزىمى التى ايدان ءۇش ايعا قىسقاردى. بيىل ءۇي سالۋىنا نەمەسە ساتىپ الۋىنا ۇتقىرلىق سەرتيفيكاتى بەرىلە باستادى. ونىڭ سىرتىندا جەرگىلىكتى اكىمدىكتەر دە، كاسىپكەرلەر دە كومەك-قولداۋ كورسەتۋگە دايىن.
«رۋدنىي قالاسىنا جاقىن ورنالاسقان بەيىمبەت مايلين، دەنيسوۆ دەگەن اۋداندار بار. دەنيسوۆ اۋدانىندا 300 ورىنعا ارنالعان قازاق مەكتەبى بار. ەندىگى كەزەكتە اۋدان اكىمى كوشىپ كەلۋگە نيەتتى قانداستار ءۇشىن ون ۇيگە دەيىن ساتىپ الۋعا دايىن ەكەنىن ايتىپ وتىر»، - دەدى وبلىس اكىمىنىڭ ورىنباسارى رينات مۇحامەتقاليەۆ.
وسى ايدا قوستاناي وبلىسىنا قانداستارعا بولىنەتىن وڭىرلىك كۆوتا 72 گە ۇلعايتىلدى. ونىڭ جارتىسىنا جۋىعى رۋدنىي قالاسىنا ءبولىندى.
