بيىل قازاقستاندا ەڭ سۇرانىسقا يە ماماندىقتار بەلگىلى بولدى

استانا. KAZINFORM - «ەڭبەك رەسۋرستارىن دامىتۋ ورتالىعى» ا ق ساراپشىلارى 2024 -جىلدىڭ II- IV توقساندارىنا Enbek.kz ەلەكتروندىق ەڭبەك بيرجاسىنىڭ دەرەكتەر بازاسىندا بوس جۇمىس ورىندارىنىڭ قىسقا مەرزىمدى بولجامىن دايىندادى.

قۇجاتقا سايكەس، 2024 -جىلى ەڭ كوپ سۇرانىسقا يە بىلىكتى ماماندىقتار مۇعالىمدەر مەن ورتا مەديتسينالىق قىزمەتكەرلەر بولادى.

بيىلعى جىلى بولجامعا بايلانىستى ە ە ب-دا جاريالاناتىن بوس جۇمىس ورىندارىنىڭ سانى 1,15 تەن 1,3 ميلليون بىرلىككە دەيىن بولادى دەپ كۇتىلۋدە. بازالىق سەناريگە سايكەس وسى جىلى ە ە ب- داعى بوس جۇمىس ورىندارىنىڭ سانى 1,2 ميلليوندى قۇرايدى، بۇل 2023 -جىلعى دەڭگەيدەن 8 پايىزعا جوعارى.

سونداي- اق بازالىق سەناري شەڭبەرىندە بيىل بوس جۇمىس ورىندارىنىڭ ەڭ كوپ سانى الماتى قالاسىندا (125 مىڭ)، قوستاناي وبلىسىندا (117 مىڭ)، استانا قالاسىندا (97 مىڭ)، قاراعاندى (88 مىڭ) جانە تۇركىستان (87 مىڭ) وڭىرلەرىندە بولادى دەپ كۇتىلۋدە.

سونىمەن قاتار نەگىزگى جانە وپتيميستىك سەناريلەردەگى بوس جۇمىس ورىندارىنىڭ ەڭ كوپ سانى كاسىبي ماماندارعا تيەسىلى. اتالعان سەناريلەردە 2024 -جىلى وسى سانات ءۇشىن بوس ورىندار سانى 311 مىڭنان 409 مىڭ بىرلىككە دەيىن، ال ولاردىڭ جالپى بوس ورىندار سانىنداعى ۇلەسى 26 پايىزدان 31 پايىزعا دەيىن بولادى دەپ كۇتىلۋدە.

وپتيميستىك سەناريدە پەسسيميستىك سەناريمەن سالىستىرعاندا كەلەسى نەگىزگى كاسىپ توپتارىنىڭ ۇلەسى جوعارى: باسشىلار مەن مەملەكەتتىك قىزمەتكەرلەر (4,7 پايىز قارسى 4,2 پايىز)؛ كاسىبي ماماندار (31 پايىز قارسى 23 پايىز)؛ تەحنيكتەر مەن كومەكشى كاسىبي قىزمەتكەرلەر (10,4 پايىز قارسى 8,1 پايىز)؛ ونەركاسىپ، قۇرىلىس، كولىك جانە باسقا دا بايلانىستى كاسىپتەردىڭ جۇمىسشىلارى (12 پايىز قارسى 9,9 پايىز)؛ وندىرىستىك جابدىقتاردىڭ وپەراتورلارى، قۇراستىرۋشىلار مەن جۇرگىزۋشىلەر (10,5 پايىز قارسى 8,6 پايىز).

پەسسيميستىك سەناريدە كاسىپتىڭ باسقا نەگىزگى توپتارىنىڭ ۇلەسى جوعارى. بۇل اكىمشىلىك قىزمەتشىلەر (3,9 پايىز قارسى 3,5 پايىز)؛ قىزمەت كورسەتۋ جانە ساتۋ سالاسىنىڭ قىزمەتكەرلەرى (11,5 پايىز قارسى 8 پايىز)؛ اۋىل شارۋاشىلىعى جانە ورمان شارۋاشىلىعى، بالىق شارۋاشىلىعى جانە بالىق شارۋاشىلىعى فەرمەرلەرى مەن جۇمىسكەرلەرى (1,2 پايىز قارسى 1,1 پايىز)؛ بىلىكتىلىگى جوق جۇمىسشىلار (30 پايىز قارسى 19 پايىز).

پەسسيميستىك سەناريدە بوس جۇمىس ورىندارىنىڭ ەڭ كوپ سانى بىلىكتىلىگى جوق جۇمىسشىلارعا تيەسىلى: 344 مىڭ (بارلىق بوس جۇمىس ورىندارىنىڭ 30 پايىز).

بازالىق سەناريدە 2024 -جىلى جالدامالى قىزمەتكەرلەرگە ەڭ ۇلكەن جيىنتىق سۇرانىس ءبىلىم بەرۋ (364 مىڭ بوس جۇمىس ورنى)، دەنساۋلىق ساقتاۋ (105 مىڭ بوس جۇمىس ورنى)، باسقا دا جەكە قىزمەتتەر كورسەتۋ (91 مىڭ بوس جۇمىس ورنى)، وڭدەۋ ونەركاسىبى (89 مىڭ بوس جۇمىس ورنى)، ساۋدا جانە اۋىل شارۋاشىلىعى (86 مىڭ بوس جۇمىس ورنى) سالالارىندا قالىپتاسادى. ءبىلىم بەرۋ سالاسىنىڭ كادرلارعا دەگەن جوعارى قاجەتتىلىگى ەلدە 2000-جىلداردىڭ باسىنان بەرى بايقالىپ كەلە جاتقان «بەبي بۋمعا» بايلانىستى.

بولجامعا سايكەس، 2024 -جىلى ەڭ كوپ سۇرانىسقا يە 10 بىلىكتى ماماندىق كەلەسىدەي:

. الەۋمەتتىك عىلىمدار بويىنشا ورتا مەكتەپ مۇعالىمدەرى (31 مىڭ بوس جۇمىس ورنى)؛

. مەكتەپكە دەيىنگى ءبىلىم بەرەتىن تاربيەشىلەر (27 مىڭ)؛

. كۇتىم كورسەتەتىن ورتا مەديتسينالىق پەرسونال (23 مىڭ)؛

. باستاۋىش سىنىپ مۇعالىمدەرى (20 مىڭ)؛

. ۇيدە ەمدەلۋشىلەرگە كۇتىم جاسايتىن قىزمەتكەرلەر (19 مىڭ)؛

. جاراتىلىستانۋ عىلىمدارى بويىنشا ورتا مەكتەپ مۇعالىمدەرى (17 مىڭ)؛

. ماتەماتيكا عىلىمدارى بويىنشا ورتا مەكتەپ مۇعالىمدەرى (16 مىڭ)؛

. بۋحگالتەرلەر (15 مىڭ)؛

. اسپازدار (13 مىڭ)؛

. ارنايى ءبىلىم بەرۋ سالاسىنداعى وزگە وقىتۋشىلار (12 مىڭ).

ماسەلەن، ءبىلىم بەرۋ جانە دەنساۋلىق ساقتاۋ سالالارىنىڭ بىلىكتى ماماندارى، سونداي-اق بۋحالتەرلەر مەن اسپازدار ەڭ كوپ سۇرانىسقا يە بولادى.