بيىل مۇحتار اۋەزوۆ پەن باۋىرجان مومىش ۇلىنىڭ كىتاپتارى وزبەك تىلىنە اۋدارىلادى

تاشكەنت. KAZINFORM - بيىل مۇحتار اۋەزوۆتىڭ «اباي جولى» رومانى مەن باۋىرجان مومىش ۇلىنىڭ «قولباسشىنىڭ كۇندەلىگى» اتتى كىتابى وزبەك تىلىنە اۋدارىلادى. بۇل تۋرالى Kazinform ءتىلشىسىنىڭ ساۋالىنا جاۋاپ بەرگەن وزبەكستان جازۋشىلار وداعىنا قاراستى قازاق ادەبيەتى كەڭەسىنىڭ ءتوراعاسى تۇرسىنالى احمەتوۆ ءمالىم ەتتى.

- وزبەكستانداعى قازاق جازۋشىلارى وزدەرىنىڭ ءتول تۋىندىلارىن جازۋمەن قاتار، كوركەم اۋدارما سالاسىنا دا ەرەكشە كوڭىل بولەدى. اتاپ ايتقاندا، بۇگىندە قازاق باتىرى باۋىرجان مومىش ۇلىنىڭ «قولباسشىنىڭ كۇندەلىگى» اتتى كىتابىن وزبەك تىلىنە اۋدارىپ، ونى باسىپ شىعارۋ بويىنشا جۇمىس جۇرگىزىلىپ جاتىر. ەڭبەك تاياۋدا جارىق كورەدى دەگەن سەنىمدەمىز. تيىسىنشە، وزبەكستاندىق وقىرمان باۋىرجان مومىش ۇلىنىڭ ادەبي مۇراسىمەن تانىسادى، - دەدى تۇرسىنالى احمەتوۆ Kazinform ءتىلشىسىنىڭ ساۋالىنا جاۋاپ بەرە وتىرىپ.

سونىمەن قاتار بيىل وزبەكستاندا اباي قۇنانباي ۇلىنىڭ 180 جىلدىعى اتالىپ وتەدى. ونىڭ اياسىندا مۇحتار اۋەزوۆتىڭ «اباي جولى» رومانىن وزبەك تىلىنە ءتارجىما جاساۋ جوسپارلانىپ وتىر.

- اباي قۇنانباي ۇلىنىڭ 180 جىلدىعىن كەڭ كولەمدە اتاپ ءوتۋ كوزدەلگەن. بۇل باعىتتاعى ءىس-شارالار وڭىرلەردە باستالىپ تا كەتتى. ۇلى ابايدىڭ شىعارماشىلىعىنا ارنالعان كونفەرەنسيالار، كەشتەر مەن جىر ءمۇشايرالارى ءوتىپ جاتىر. ءبارىمىز بىلەتىندەي، مۇحتار اۋەزوۆتىڭ «اباي جولى» رومانى ادەبيەتكە قۇبىلىس اكەلدى. كەزىندە بۇل ەڭبەك وزبەك تىلىنە اۋدارىلعان. دەگەنمەن بيىل وسى كىتاپتى وزبەك تىلىنە قايتا ءتارجىما جاساپ، وعان جاڭاشا رەنك بەرۋدى جوسپارلاپ وتىرمىز. جۋىردا بۇل جۇمىستاردىڭ ناتيجەسىن جاريالايمىز، - دەپ ءمالىم ەتتى تۇرسىنالى احمەتوۆ.

ەسكە سالايىق، بۇگىندە وزبەكستاندا ابايدىڭ 180 جىلدىعى كەڭىنەن تويلانىپ جاتىر.

قوسا كەتسەك، بىلتىر قازاقستاننىڭ تاجىكستانداعى مادەنيەت كۇندەرى اياسىندا فيرداۋسي اتىنداعى مادەنيەت جانە دەمالىس ساياباعىندا قازاق اقىنى جانە ويشىلى اباي قۇنانباي ۇلىنىڭ بيۋستى ورناتىلادى.

اۆتور

ءاليحان اسقار