بيىل الماتىدا 1-سىنىپقا قانشا وقۋشى قابىلدانادى جانە قانشا جاڭا مەكتەپ اشىلادى
الماتى. KAZINFORM - الماتى قالاسىندا 7 جاڭا مەكتەپتىڭ قۇرىلىسى اياقتالدى، تاعى 4 مەكتەپ تامىز ايىنىڭ سوڭىنا دەيىن پايدالانۋعا بەرىلمەك.
بۇل تۋرالى Kazinform ساۋالىنا جاۋاپ بەرگەن الماتى قالاسىنىڭ ءبىلىم باسقارماسى مالىمدەدى.
- «جايلى مەكتەپ» ۇلتتىق جوباسى اياسىندا الماتى قالاسىندا 34800 ورىنعا ارنالعان 21 مەكتەپتىڭ قۇرىلىسى جوسپارلانعان. 2024 -جىلدىڭ قىركۇيەگىندە 600 ورىنعا ارنالعان №97-مەكتەپ پايدالانۋعا بەرىلدى. بۇگىندە 12000 ورىنعا ارنالعان 7 مەكتەپتىڭ قۇرىلىسى اياقتالىپ، ۋاكىلەتتى ورگاندارمەن پايدالانۋعا بەرۋ اكتىلەرى كەلىسىلىپ جاتىر. 2025 -جىلعى 30-تامىزعا دەيىن 8000 ورىنعا ارنالعان 4 مەكتەپتىڭ قۇرىلىسىن اياقتاۋ كوزدەلىپ وتىر، - دەلىنگەن باسقارما جاۋابىندا.
ودان بولەك بوستاندىق اۋدانىندا 2500 ورىنعا مەكتەپ قۇرىلىسى ءجۇرىپ جاتىر. قۇرىلىس جۇمىستارىنىڭ %80 ى ورىندالعان، نىساندى 2025 -جىلعى 30-قازانعا دەيىن تاپسىرۋ جوسپارلانعان. ال جىل سوڭىنا دەيىن 11700 ورىنعا ارنالعان 8 مەكتەپتىڭ قۇرىلىسى اياقتالادى.
- الاتاۋ اۋدانىندا 550 ورىندىق مەكتەپتىڭ قۇرىلىسى جۇرگىزىلىپ جاتىر. سونداي-اق ناۋرىزباي اۋدانىندا 1200 ورىندىق جاڭا مەكتەپتى جەرگىلىكتى بيۋدجەت ەسەبىنەن ساتىپ الۋ جوسپارلانعان. وسىلايشا، بيىل 35950 جاڭا وقۋشى ورنى اشىلادى، - دەپ حابارلادى باسقارمادان.
«1300 مەكتەپتى جاڭعىرتۋ» جوباسىنىڭ تىزىمىنە قالادا 31 مەكتەپ كىرگەن. بيىل ونىڭ 15 ىندە كۇردەلى جوندەۋ جۇمىستارى باستالادى.
ءبىلىم باسقارماسىنىڭ بولجامىنا سايكەس، 1-قىركۇيەكتە 26 مىڭنان استام 1-سىنىپ وقۋشىسى مەكتەپ تابالدىرىعىن اتتايدى. ءبىرىنشى سىنىپقا قۇجات قابىلداۋ 1-ساۋىردە باستالدى جانە 31-تامىزعا دەيىن جالعاسادى. بۇگىنگى كۇنى مەكتەپتەرگە 18 مىڭنان استام بالا قابىلدانعان. كەيىنگى 5 جىلدا 30 مىڭعا جۋىق بالا جىل سايىن ءبىرىنشى سىنىپقا قابىلدانىپ كەلەدى.
