بيىككە بەت العان قىر بالاسى
استانا. KAZINFORM - «تولاعاي بوپ تۋىلمادىم، اتتەڭ-اي... اتىراۋعا اكەلەر مە ەم ءبىر تاۋدى...» - دەپ كەشىن باستادى قىر بالاسى. بۇل ونىڭ تۋعان جەرى، كيەلى مەكەنىنە دەگەن شەكسىز ساعىنىشى مەن قۇرمەتىنىڭ كورىنىسى ەدى. باتىس ءوڭىردىڭ بولمىسىن بويىنا سىڭىرگەن ونەرپاز سول ءبىر ساتتەن-اق كورەرمەندى ءوزىنىڭ سىرلى الەمىنە جەتەلەي الدى.
بۇل ۇلتتىق ۇلان ءان-بي انسامبلىنىڭ ءسوليسى اسحات ءامىرعاليدىڭ جەكە شىعارماشىلىق كەشى. بۇل جاندى داۋىستى جانىنا سەرىك ەتكەن، تابىلدى دوسىموۆتىڭ اندەرىن وزىندىك مانەردە جاڭعىرتىپ جۇرگەن ءانشىنىڭ كورەرمەنمەن سىرلاسقان ءساتى ەدى.
بۇل - اتىراۋ توپىراعىندا دۇنيەگە كەلگەن، باتىسقا ءتان مىنەز بەن مۇڭدى بويىنا سىڭىرگەن ونەرپازدىڭ ءومىر جولى. اسحات ءامىرعالي - التى بالانىڭ كەنجەسى. ءۇيدىڭ ەركەسى بولىپ، اتا-اناسىنىڭ مەيىرىمىنە بولەنىپ وسكەن بالا ءۇشىن ونەرگە كەلۋ كەزدەيسوقتىق ەمەس ەدى. بالكىم، بەتىن قاقپاي، ەركىن وسىرگەن تاربيەنىڭ ءوزى ونىڭ جۇرەگىندەگى اۋەندى ەرتە وياتقان بولار.
ساحناداعى سەنىمدىلىك پەن ىشكى ەركىندىك - سول بالالىقتىڭ جالعاسى ىسپەتتى. ونەرپاز ءۇشىن بۇل كەش تەك كونتسەرت ەمەس، ءومىرىنىڭ ءبىر بەلەسى ەدى. ويتكەنى بۇل - ونىڭ ەكىنشى شىعارماشىلىق كەشى. ال العاشقى قادامىن ول تۋعان جەرىندە جاساپ، ەلىنىڭ باتاسىن العان. باتىس جۇرتىنىڭ ۇيىمشىلدىعى مەن قولداۋى - ونىڭ ءاردايىم تىرەگى. سول قولداۋدى بۇل جولى دا سەزىندى: كەشكە ارنايى كەلگەن اناسى، جارى، باۋىرلارى ونىڭ ءار انىنە ءۇنسىز دەمەۋ بولىپ وتىردى.
ونەر ادامى عانا ەمەس، كوپبالالى اكە دە - ونىڭ ءومىرىنىڭ اجىراماس بولىگى. بەس بالانىڭ اكەسى، ءۇش ۇل مەن ەكى قىزدىڭ تىرەگى. بالالارى دا اكە جولىن جالعاپ، ونەرگە جاقىن، شىعارماشىلىققا بەيىم. اكەسى كورگەن تاربيەنى ول دا جالعاستىرىپ كەلەدى - بالا جۇرەگىندەگى ۇشقىندى وشىرمەي، ەركىن سامعاۋىنا مۇمكىندىك بەرەدى.
ومىرىندەگى ەرەكشە ورىن الاتىن جان - ونىڭ جارى. شابىتتىڭ قاينار كوزىنە اينالعان جان سەرىگىنە ارناپ جازىلعان «اۋزىنان ايدىڭ تۇسكەن قىز» ءانى - ونىڭ ىشكى سەزىمىنىڭ كورىنىسى. بۇل تۋىندىدا تەك ماحاببات ەمەس، ريزاشىلىق پەن قۇرمەتتىڭ ءۇنى بار.
ونەر جولىنداعى العاشقى ۇلكەن قادامدارىندا وعان باعىت- باعدار بەرگەن تۇلعالار دا از ەمەس. مارقۇم ارمان دۇيسەنوۆ ونەردەگى جولىن ايقىنداۋدا ۇلكەن ءرول اتقارىپ، ونى نۇرلان ونەربايەۆپەن تانىستىرعان. وسى تانىستىق كەيىن شىعارماشىلىق بايلانىسقا ۇلاسىپ، «ونەگە» ءانى ارقىلى كورەرمەنگە جول تارتتى. بۇل كەشتە دە سول ءان دۋەت رەتىندە ورىندالىپ، ساحناداعى شىنايى ارىپتەستىك پەن سىيلاستىقتىڭ كورىنىسىنە اينالدى.
كونسەرت بارىسىندا ونەردەگى ارىپتەستەرى دە ساحنا تورىنە شىعىپ، اسحاتقا جۇرەكجاردى لەبىزدەرىن ارنادى. بۇل - تەك ارىپتەستىك ەمەس، ونەردەگى شىنايى قۇرمەت پەن باۋىرمالدىقتىڭ بەلگىسى ەدى.
ال ۇلتتىق ۇلان ساپىنداعى قىزمەتى - ونىڭ ءومىرىنىڭ تاعى ءبىر ماڭىزدى بولىگى. التى جىل بويى ەلگە قىزمەت ەتىپ كەلە جاتقان قازاقستان رەسپۋبليكاسى ءىىم ۇلتتىق ۇلانى قاتارىنداعى ونەرپاز ءۇشىن ساحنا مەن قىزمەت - ەگىز ۇعىم. ول ونەر مەن ءتارتىپتى، سەزىم مەن جاۋاپكەرشىلىكتى قاتار الىپ جۇرگەن جان.
بۇل كەش - تەك ءان كەشى ەمەس. بۇل - ءبىر ادامنىڭ تاعدىرى، تۋعان جەرگە دەگەن ساعىنىشى، وتباسىنا دەگەن ماحابباتى مەن ونەرگە دەگەن ادالدىعى توعىسقان ءسات. وسىنداي ساتتەر ارقىلى كورەرمەن تەك ءان تىڭداپ قانا قويماي، ءبىر جۇرەكتىڭ سوعىسىن سەزىنە الدى.
جانەركە مۇرات قىزى
turkystan.kz
