بىرىككەن اراب امىرلىكتەرىنە تيەسىلى كومپانيا قونايەۆتا قانت زاۋىتىن سالماق
استانا. KAZINFORM - الماتى وبلىسى اۋقىمدى ينۆەستيتسيالىق جوبانىڭ الاڭىنا اينالۋى مۇمكىن. الەمدەگى قانت يندۋسترياسىنىڭ كوشباسشىلارىنىڭ ءبىرى - بىرىككەن اراب امىرلىكتەرىنىڭ Al Khaleej Sugar كومپانياسى قونايەۆ قالاسىنا جاقىن جەردە قانت زاۋىتىن سالۋ مۇمكىندىگىن قاراستىرىپ جاتىر.
ق ر اۋىل شارۋاشىلىعى مينيسترلىگى باسپا ءسوز قىزمەتىنىڭ مالىمەتىنشە، ىنتىماقتاستىق پەرسپەكتيۆالارى الماتى وبلىسىنىڭ اكىمى مارات سۇلتانعازيەۆ پەن كومپانيانىڭ باسقارۋشى ديرەكتورى شەيح دجامال ءال عۋراير اراسىنداعى كەزدەسۋدە تالقىلاندى. تاراپتار نەگىزگى ماسەلەلەردى - جەر ۋچاسكەسىن تاڭداۋ، قانت قىزىلشاسىنا ارنالعان ەگىس القاپتارىن ۇيىمداستىرۋ، سۋ رەسۋرستارىنا قول جەتكىزۋ جانە زاۋىتتى ەنەرگيامەن قامتاماسىز ەتۋ جايىن تالقىلادى.
قازىر جوبانى جۇزەگە اسىرۋ ءۇشىن ەڭ قولايلى ورىن رەتىندە قونايەۆ قالاسىنا جاقىن ورنالاسقان اۋماق لوگيستيكالىق ىڭعايلىلىعىنىڭ ارقاسىندا تاڭدالىپ وتىر.
- ءبىز قايتا جاڭارتىلاتىن ەنەرگيا كوزدەرىن پايدالانا وتىرىپ، تولىقتاي اۆتونومدى كاسىپورىن قۇرعىمىز كەلەدى. بۇل قورشاعان ورتاعا اسەردى بارىنشا ازايتۋعا مۇمكىندىك بەرەدى، - دەپ اتاپ ءوتتى شەيح دجامال ءال عۋراير.
Al Khaleej Sugar - الەمدەگى ەڭ ءىرى اۆتونومدى قانت زاۋىتى، جاھاندىق تازارتىلعان قانت نارىعىنىڭ شامامەن %3 ىن قامتاماسىز ەتەدى.
كومپانيا وندىرىستەن باستاپ قۇرىلىس پەن جىلجىمايتىن مۇلىككە دەيىنگى ءتۇرلى سالالاردا تابىستى جوبالارىمەن تانىمال.
بۇعان دەيىن جامبىل وبلىسىندا قانت زاۋىتى سالىناتىنىن جازعان ەدىك.
