بىرنەشە وڭىردە قىلمىستىق توپتار قولعا ءتۇستى
استانا. KAZINFORM - ىشكى ىستەر مينيسترلىگى تاعى بىرنەشە قىلمىستىق توپتى اشكەرەلەدى.

قاڭتاردا پاۆلوداردا جەرگىلىكتى كريميناليتەت اراسىنان ءبىر توپ ادام ۇستالدى. ولار جۇيەلى تۇردە جاستاردى بوپسالاپ، كامەلەتكە تولماعاندى قىلمىستىق ارەكەتكە تارتقان.
پەتروپاۆلدا دا ءۇش ادامنان تۇراتىن توپ ۇستالدى. فيگۋرانتتاردىڭ بىرەۋى بۇرىن بىرنەشە رەت سوتتالعان. كۇدىكتىلەر جەرگىلىكتى تۇرعىندى زاڭسىز قاماۋدا ۇستاپ، ۇرىپ-سوعىپ، اقشا بوسپالاعان.
جامبىل وبلىسىندا شارۋا قوجالىعىنىڭ باسشىسىنان 800 مىڭ تەڭگە اقشا بوپسالاعان كۇدىكتىلەر ۇستالدى. ءتىنتۋ بارىسىندا ولاردان شولاق مىلتىق پەن وق-ءدارى تاركىلەندى. تەرگەۋ بوپسالاۋ جانە اتىس قارۋىن زاڭسىز ساقتاۋ دەرەكتەرى بويىنشا جۇرگىزىلىپ جاتىر.
«بىلتىر پوليتسيا 500 دەن اسا بوپسالاۋ قىلمىستارىن انىقتادى. كوبىنە قىلمىسكەرلەر قورقىتۋ ارقىلى اقشا بوپسالاعان. مۇنداي دەرەك الماتى قالاسىندا انىقتالعان. وندا جەدەل ءىس-شارالاردىڭ ناتيجەسىندە ۇيىمداسقان قىلمىسقا قارسى كۇرەس باسقارماسى 4 ازاماتتى ۇستادى. ولار جەرگىلىكتى تۇرعىننان بەدەلىن تۇسىرەتىن بەينەماتەريالداردى تاراتپاعانى ءۇشىن 40 ميلليون تەڭگە تالاپ ەتكەن»، - دەدى ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.