بىرنەشە وقۋ ورنىنىڭ ىشىنەن تاڭداۋىم «رەال مادريدكە» ءتۇستى - شەتەلدەگى قازاق قىزى
استانا. KAZINFORM - كۇنى كەشە قازاق قىزىنىڭ مادريدتىك «رەال» كلۋبىنا قىزمەتكە ورنالاسقانىن جازعان ەدىك.
ماركەتولوگ «بۇگىن LIVE» باعدارلاماسىنا ونلاين بايلانىسقا شىعىپ، الەمدىك برەندكە اينالعان فۋتبول قۇراماسىنا قالاي تاپ بولعانىن ايتىپ بەردى.
- بۇل وتە قىزىقتى جول. مەنىڭ العاشقى ماماندىعىم - ماركەتولوگ. الماتىداعى كيمەپ ۋنيۆەرسيتەتىن اياقتادىم. ءوز سالام بويىنشا 13 جىلدان بەرى قىزمەت ەتىپ كەلە جاتىرمىن. ماماندىعىمدى قاتتى جاقسى كورەمىن. وتكەن جىلى سپورتتىق ماركەتينگ سالاسى بويىنشا ءبىلىم الۋعا شەشىم قابىلدادىم. ال وقۋ ءۇشىن يسپانيا مەملەكەتىن تاڭدادىم. بىرنەشە وقۋ ورىندارىنىڭ ىشىنەن تاڭداۋىم «رەال مادريدكە» ءتۇستى. سەبەبى ولار مەملەكەتتىك ۇلگىدەگى ديپلوم بەرەدى. سونىمەن قاتار يسپانيادا تۇرۋعا، ۇزدىكتەردەن ءبىلىم الۋعا، الەمدىك دەڭگەيدەگى برەندتىك كلۋبتا جۇمىس ىستەۋگە وڭتايلى مۇمكىندىك بولدى، - دەيدى البينا بۋنەسكۋ.
13 جىلدان بەرى ماركەتولوگيا سالاسىندا تاجىريبەسى بار مامان سپورتتىق ماركەتولوگتىڭ نەگىزگى مىندەتىن ءتۇسىندىردى.
- سپورتتىق ماركەتولوگ - سپورت يندۋسترياسىنىڭ كەز كەلگەن باعىتىندا فەدەراتسيالارمەن، كلۋبتارمەن، اتلەتتەرمەن جۇمىس ىستەيدى. سپورتتىق ماركەتولوگتىڭ باستى مىندەتى - ول قاي سالادا جۇمىس ىستەسە دە، سول سپورتتىڭ اتىن شىعارۋ. ەكىنشىدەن، سپورتقا، سپورتتىق ۇيىمعا تابىس تابۋعا كومەكتەسۋ. ياعني ءتيىمدى بيزنەس- مودەل قۇرىپ، تۇراقتى مونەتيزاتسيا جولدارىن ويلاستىرۋ، برەندتىڭ تانىلۋىنا جاردەمدەسۋ، جانكۇيەرلەرمەن عانا ەمەس، وسى سالادا دامۋعا كومەكتەسەتىن كەز كەلگەن ادامدارمەن كوممۋنيكاتسيا قۇرۋ. ءۇشىنشى فۋنكسياسى - ۇيىمداستىرىلىپ جاتقان ءتۇرلى سپورتتىق شارالار مەن تۋرنيرلەردى باسقارۋ جۇمىستارىنا كومەكتەسۋ، - دەيدى ماركەتولوگ.
«رەال مادريدتە» قىزمەت ەتەتىن قازاقستاندىق ارۋ ەلىمىزدەگى سپورت سالاسىن دامىتۋدى وزىنە ماقسات ەتكەن.
- وقۋىمدى بىتىرگەن سوڭ قازاقستانعا قايتىپ، سوندا جۇمىس ىستەۋدى جوسپارلاپ وتىرمىن. مەن ەلىمدى قاتتى ساعىندىم. سەبەبى مەنىڭ سپورتتىق ماركەتينگتى وقۋداعى نەگىزگى ماقساتىم - قازاقستانداعى سپورتتى دامىتۋ. مەن ەلىمىزدەگى سپورت سالاسىنان وتە ۇلكەن بولاشاق كورەمىن. بىزدە جاڭادان سالىنعان، سالىنىپ جاتقان سپورتتىق عيماراتتار وتە كوپ. ءبىراق مەنەدجمەنتكە كەلگەندە ماماندار جەتىسپەي جاتادى. سول سەبەپتى وسى باعىتتا تەرەڭ ءبىلىم الۋىم كەرەكتىگىن ءتۇسىندىم، - دەيدى ول.
ايتا كەتەيىك، قازاقستاندىق ارۋ وتاندىق درونداردى جاساپ شىعارماق.
