بۇگىننەن باستاپ قوقىس ساتىپ الاتىن پورتالعا تىركەلۋ باستالادى
استانا. KAZINFORM -بۇگىننەن باستاپ قالدىقتى قايتا وڭدەۋشىلەرگە «ەلەكتروندى اۋكسيون» پرينتسيپىمەن قالدىق ساتۋعا مۇمكىندىك بەرەتىن اقپاراتتىق جۇيەگە تىركەلۋ باستالادى.
بۇل تۋرالى «جاسىل دامۋ» ا ق باسقارما ءتوراعاسى ەرجان سارسەنباي ورتالىق كوممۋنيكاتسيالار قىزمەتىندە وتكەن بريفينگىدە ءمالىم ەتتى.
«بۇگىننەن باستاپ EcoQoldau اۆتوماتتاندىرىلعان جۇيەسى ىسكە قوسىلدى. جاقىن ارادا وڭىرلەردى ماتەريالدىق- تەحنيكالىق جاراقتاندىرۋعا باعىتتالعان جوبالاردى قارجىلاندىرۋ باستالادى. EcoQoldau قالدىقتاردى باسقارۋ سالاسىنداعى بيزنەس پروتسەستەردى جەڭىلدەتىپ، ەلدەگى ەكولوگيالىق احۋالعا وڭ اسەر ەتەدى. 2021 -جىلى وسى ماقساتتا 6,1 ميلليارد تەڭگە تولەندى. ونىڭ ىشىندە اۆتوكومپونەتتەردى قايتا وڭدەۋگە 1,1 ميلليارد تەڭگە، پلاستيك، كارتون، شىنى قاپتامالاردى قايتا وڭدەۋگە 5 ميلليارد تەڭگە تولەندى»، - دەدى «جاسىل دامۋ» ا ق باسشىسى.
سونداي- اق، ول EcoQoldau اۆتوماتتاندىرىلعان جۇيەسى ارقىلى قالدىق ساتۋ قالاي ىسكە اساتىنىن ءتۇسىندىردى.
«ءبىرىنشى جەكە نەمەسە زادى تۇلعا موبيلدى قوسىمشا ارقىلى جۇيەگە تىركەلىپ، جينالعان قالدىقتى ساتاتىنى تۋرالى ءوتىنىم قالدىرادى. ودان ءارى قالدىق جيناۋشىلار ءوز باعالارىن ۇسىنىپ، قالدىق يەسىنەن ونى ساتىپ الادى. جيناۋشىلار اي بويى جيناعان قالدىق تۋرالى دەرەكتى EcoQoldau جۇيەسىنە ەنگىزىپ، حابارلاندىرۋ جاريالاپ وتىرادى. جيناۋشىلار كوڭىلىنەن شىققان ساتىپ الۋشىمەن كەلىسىمشارت جاسايدى. ودان كەيىن جيناۋشى قالدىقتى تاسىمالداۋ جونىندە حابارلاندىرۋ شىعارادى. ال ونى كىمنىڭ تاسيتىنىن قالدىق يەسى دەربەس تاڭداپ، قالدىقتى قايتا وڭدەۋشىگە دەيىن جەتكىزۋ تۋرالى كەلىسىمشارت جاساسادى. قايتا وڭدەۋشى سەنىمدى سالماق ولشەيتىن قۇرال ارقىلى ساتىپ الىنعان قالدىقتى قابىلداپ، ءتيىستى اكتىگە قول قويادى. وسىدان كەيىن قالدىقتى ساتۋشى مەن قايتا وڭدەۋشى وپەراتورعا ەسەپ جىبەرەدى. سول ەسەپتىڭ نەگىزىندە تولەم جاسالادى. قالدىق ساتۋشى اياقتالعان ايدىڭ ەسەبىن كەلەسى ايدىڭ 15 ىنە دەيىن، قالدىق وڭدەۋشىلەر تولعان توقساننىڭ ەسەبىن كەلەسى ايدىڭ 25 ىنە دەيىن جىبەرۋى كەرەك. بۇل پروتسەسس اقپاراتتىق جۇيەگە تىركەلگەن بارلىق پايدالانۋشىلارعا قولجەتىمدى. باعا ساياساتىن نارىقتىق قاتىناس رەتتەيدى»، - دەدى ەرجان سارسەنباي.
