بۇگىننەن باستاپ Air Astana ۇشاقتارىمەن ەرەسەكتەردىڭ قاراۋىنسىز ۇشاتىن بالالار اقى تولەيدى
استانا. KAZINFORM - ەندى بالالاردى ۇشاققا جالعىز وتىرعىزاتىن بولساڭىز، اقى تولەۋگە تۋرا كەلەدى. «Air Astana» اۋە كومپانياسى بۇگىننەن باستاپ وسىنداي ەرەجەنىڭ ەنگىزىلگەنىن حابارلادى.
«ەرەسەكتەرسىز جولعا شىعاتىن 6 جاستان 15 جاسقا دەيىنگى بالالاردى تاسىمالداۋ ءۇشىن ارنايى الىم تولەۋ كەرەك. ونىڭ قۇنى ءبىر جاعىنا - 9750 تەڭگە نەمەسە 20 ا ق ش دوللارى»، - دەلىنگەن حابارلامادا.
اۋە كومپانياسىنىڭ مالىمەتىنشە، بۇل قارجىعا بورت قىزمەتكەرلەرى ساپارلايتىن بالانى اۋەجايعا تىركەلگەن ساتتەن باستاپ باراتىن جەردەگى جاۋاپتى تۇلعامەن كەزدەسۋىنە دەيىن الىپ جۇرەدى. كىشكەنتاي جولاۋشىلار ۇشاققا ءبىرىنشى بولىپ ءمىنىپ، سوڭعى قاتاردا وتىرادى ءارى ولاردى ەكيپاج باقىلايدى.
زاڭدى وكىلدەر بالانى ستيۋاردەسسالارعا تاپسىرۋ ءۇشىن اۋەجايعا ۇشۋ ۋاقىتىنان كەمىندە 1,5-2 ساعات بۇرىن كەلۋى كەرەك. بالالاردى ۇشاقپەن جالعىز تاسىمالداۋ كەزىندە ەلەكتروندىق قۇجاتتاردى قولدانۋعا رۇقسات ەتىلمەيدى.
