بۇگىن قازاقستاندىق كلۋبتاردىڭ ەۋروكۋبوكتاعى قارسىلاستارى انىقتالادى

استانا. KAZINFORM - بۇگىن ەۋروكۋبوك جارىستارىنىڭ ىرىكتەۋ كەزەڭىنە ارنالعان جەرەبە تارتۋ ءراسىمى وتەدى. قازاقستاندىق كلۋبتاردىڭ دا قارسىلاستارى بەلگىلى بولادى.

وتكەن جىلى ەل چەمپيونى اتانعان «ورداباسى» بيىل چەمپيوندار ليگاسىندا باق سىنايدى. شىمكەنتتىك كومانداعا «لۋدوگورەتس» (بولگاريا)، «ستياۋا» (رۋمىنيا)، «پيۋنيك» (ارمەنيا) جانە «پەتروكۋب» (مولدوۆا) كوماندالارىنىڭ ءبىرى قارسىلاس اتانادى. چەمپيوندار ليگاسىنىڭ جەرەبەسى استانا ۋاقىتىمەن ساعات 17:00 دە باستالادى.

ەۋروپا ليگاسىندا «توبىلدىڭ» دا قارسىلاسى انىقتالادى. ءبىرىنشى ىرىكتەۋ كەزەڭىندە قوستانايلىق كلۋبقا «ەلفسبورگ» (شۆەتسيا)، «كورۆينۋل» (رۋمىنيا)، «بوتيەۆ» (بولگاريا)، «زيريا» (ازەربايدجان)، «رۋجومبەروك» (سلوۆاكيا) جانە «لاپي» (كوسوۆو) كوماندالارى ىقتيمال قارسىلاس اتانىپ وتىر. ال «استانا» كومانداسى ىرىكتەۋدى ەكىنشى كەزەڭنەن باستايدى. جەرەبە 18:00 دە وتەدى.

كونفەرەنسيا ليگاسىنا «اقتوبە» قاتىسادى. ولارعا ءبىرىنشى كەزەڭدە «دينامو» تبيليسي (گرۋزيا)، «پارتيزاني» (البانيا)، «ميلسامي» (مولدوۆا)، «سارايەۆو» (بوسنيا جانە گەرتسەگوۆينا) جانە «ۋرارتۋ» (ارمەنيا) كوماندالارىنىڭ ءبىرى قارسىلاس بولادى. كونفەرەنسيا ليگاسىنىڭ جەرەبەسى 19:00 گە جوسپارلانعان.