بۇگىن كومپوزيتور سىدىق مۇحامەدجانوۆتىڭ تۋعانىنا - 100 جىل
استانا. KAZINFORM - سىدىق مۇحامەدجانوۆتىڭ قازاق ءان ونەرىندە اباي ولەڭدەرىنە جازىلعان «جارق ەتپەس قارا كوڭىلىم نە قىلسا دا»، «وزگەگە كوڭىلىم تويارسىڭ»، «قاقتاعان اق كۇمىستەي كەڭ ماڭدايلى» «عاشىقتىڭ ءتىلى - ءتىلسىز ءتىل» اتتى اندەرى زامانىندا ەرەكشە دارالاندى. ونەر يەسى ۇلكەن ساحنالارعا قويىلعان وپەرالارعا ءىرى تۋىندىلار جازدى.
بۇگىن - كومپوزيتور، قازاقستاننىڭ ەڭبەك سىڭىرگەن قايراتكەرى، ك س ر و جانە قازاقستاننىڭ حالىق ءارتيسى، ق ر مەملەكەتتىك سىيلىعىنىڭ لاۋرەاتى سىدىق مۇحامەدجانوۆ دۇنيەگە كەلگەن كۇن. ونەر يەسىنىڭ تۋعانىنا 100 جىل تولىپ وتىر.
س. مۇحامەدجانوۆ قازىرگى قاراعاندى وبلىسى شەت اۋدانىندا تۋعان. الماتى كونسەرۆاتورياسىنىڭ (قازىرگى قازاق ۇلتتىق كونسەرۆاتورياسى) كومپوزيتورلىق ءبولىمىن بىتىرگەن. كونسەرۆاتوريادا وقىعان جىلدارى قازاق راديوسىندا مۋزىكالىق رەداكتور بولدى جانە ەلىمىزدىڭ مادەنيەت مينيسترلىگىندە قىزمەت ىستەدى.
1960-1962 -جىلدارى - قازاقستان كومپوزيتورلار وداعى باسقارماسىنىڭ ءتوراعاسى. 1964-1968 -جىلدارى - قازاق فيلارمونياسىنىڭ ديرەكتورى ءارى مۋزىكالىق جەتەكشىسى. 1969-1972 -جىلدارى قازاق اكادەميالىق وپەرا جانە بالەت تەاترىنىڭ ديرەكتورى قىزمەتتەرىن اتقارعان.
ونىڭ قازاق ءان ونەرىندە اباي ولەڭدەرىنە جازىلعان «جارق ەتپەس قارا كوڭىلىم نە قىلسا دا»، «وزگەگە كوڭىلىم تويارسىڭ»، «قاقتاعان اق كۇمىستەي كەڭ ماڭدايلى»، «عاشىقتىڭ ءتىلى - ءتىلسىز ءتىل» اتتى اندەرى ەرەكشە دارالاندى. شۋاقتى ليريزمگە تۇنعان «كوكتەم ءۆالسى»، «سىرلى قايىڭ»، «شولپانىم»، «تەربەلەدى تىڭ دالا»، «جارقىرايدى تەمىرتاۋدىڭ وتتارى»، «ەڭبەك ءانى»، «جاستار مارشى»، تاعى باسقا بالالىق شاق، جاستىق شاق، بەيبىتشىلىك، ەڭبەكتى جىر ەتكەن كوپتەگەن ءانى مەن رومانستارى ەل اراسىندا كەڭىنەن تانىمال.
مۇحامەدجانوۆ «بەكەت»، «اقان سەرى - اقتوتى» وپەرالارىن، «عاسىرلار ءۇنى وراتورياسىن جازدى. ال، «داۋىل» اتتى بىرنەشە ءبولىم سيمفونياسى ۇلتتىق مۋزىكاعا قوسىلعان ەلەۋلى ۇلەس بولدى. ونىڭ سكريپكا مەن فورتەپيانوعا ارنالعان سوناتالارى، حالىق اسپاپتار وركەسترىنە جازىلعان پەسالارى، كۇيلەرى، كامەرالىق وركەسترگە جازىلعان پوەمالارى قازاقتىڭ اسپاپتىق، وركەسترلىك، كامەرالىق شىعارمالارىنىڭ جان- جاقتى دامىعاندىعىن، ونىڭ بيىك كوركەمدىك دارەجەسىن كورسەتەدى.
«جارق ەتپەس قارا كوڭىلىم، نە قىلسا دا.. .» ولەڭى ءانى كەزىندە ونەر تارلاندارىنىڭ جوعارى باعاسىن العان. كوركەمدىك كەڭەستە جاس كومپوزيتور سىدىق مۇحامەدجانوۆتىڭ اتالعان تۋىندىسىن تىڭداعان ەۆگەنيي برۋسيلوۆسكي دە ءاندى ەرەكشە باعالاعان.
«تاماشا! ءبارى ءوز ورنىندا! قيسىندى، قىزىقتى. ەڭ باستىسى، مۇندا ۇلتتىڭ جانى بار، جانى! ماسەلەن، «ەرتارعىن» وپەراسىنا «ەلىم- اي» ءانىن پايدالاندىم. قاراپايىم اۋەز دەرسىز، ال ونىڭ سالماعى قانداي ءزىلماۋىر. مىنا جىگىتتىڭ ءانى دە وسىنداي. ءبىر قىزىعى، ابايدىڭ ءوزى جازعان سەكىلدى بۇل رومانستى. ايتارعا ءسوز جوق!»، - دەپ باعا بەرەدى اتاقتى كومپوزيتور.
س. مۇحامەدجانوۆ «حالىقتار دوستىعى»، «قۇرمەت بەلگىسى» وردەندەرىمەن جانە مەدالدارمەن ماراپاتتالعان.
