بۇگىن اقىن، قوعام قايراتكەرى مۇحتار شاحانوۆتىڭ تۋعان كۇنى

بۇگىن، 2-شىلدە كۇنى تۇلعالاردان كىمدەر دۇنيەگە كەلگەن؟ Kazinform وقىرماندارىنا ۇسىنامىز.

82 جىل بۇرىن (1942) قازاقستان رەسپۋبليكاسى پرەزيدەنتى جانىنداعى ۇلتتىق قۇرىلتاي مۇشەسى، قازاقستاننىڭ ەڭبەك ەرى، قازاقستان جانە قىرعىز رەسپۋبليكاسىنىڭ حالىق اقىنى، جازۋشى، قوعام قايراتكەرى مۇحتار شاحانوۆ دۇنيەگە كەلدى.

وڭتۇستىك قازاقستان وبلىسى وتىرار اۋدانى شىلىك اۋىلىندا تۋعان. جەتى جىلدىق مەكتەپتى بىتىرگەن سوڭ، تراكتور تىركەۋشىسى، وبلىستىق «وڭتۇستىك قازاقستان» گازەتىندە كوررەكتور، ادەبي قىزمەتكەر، «لەنينشىل جاس» گازەتىندە وڭتۇستىك وبلىستار بويىنشا مەنشىكتى ءتىلشى، قازاقستان جازۋشىلار وداعى باسقارماسىنىڭ حاتشىسى، رەسپۋبليكالىق «جالىن» جۋرنالىنىڭ باس رەداكتورى ت. ب. قىزمەتتەر اتقاردى. ك س ر و حالىق دەپۋتاتى، ك س ر و جوعارعى كەڭەسىنىڭ مۇشەسى، ق ر حالىق دەپۋتاتى بولدى.

1993-2003 -جىلدارى قازاقستان رەسپۋبليكاسىنىڭ قىرعىز رەسپۋبليكاسىنداعى توتەنشە جانە وكىلەتتى ەلشىسى قىزمەتىندە بولدى. 2003-2004 -جىلدارى «جالىن» جۋرنالىنىڭ باس رەداكتورى، الەم ويشىلدارىنىڭ باسىن بىرىكتىرەتىن «XXI عاسىر جانە رۋحانيات» اتتى حالىقارالىق ەليتا كلۋبىنىڭ پرەزيدەنتى. 2004 -جىلى ق ر پارلامەنتى ءماجىلىسىنىڭ دەپۋتاتى بولدى.

كوپتەگەن ولەڭ كىتاپتارىنىڭ جانە حالىق اراسىنا كەڭ تاراعان ءبىرقاتار اندەردىڭ اۆتورى. باللادالارى مەن پوەمالارى دۇنيە ءجۇزى حالىقتارىنىڭ 20 دان استام تىلىنە اۋدارىلعان.

«ماحاببات زاڭى»، «سەنىم پاتشالىعى»، «سوكراتتى ەسكە الۋ ءتۇنى» اتتى درامالارى رەسپۋبليكامىزدا جانە شەتەل تەاترلارىندا قويىلعان. ش. ايتماتوۆپەن بىرلەسىپ جازعان «قۇز باسىنداعى اڭشىنىڭ زارى» اتتى ەسسە كىتابى مەن «سوكراتتى ەسكە الۋ ءتۇنى» دراماسى كوپتەگەن تىلدەرگە اۋدارىلعان.

«شىڭعىس حاننىڭ پەندەلىك قۇپياسى» درامالىق تۋىندىسى نەگىزىندە ۋكراينانىڭ دوۆجەنكو اتىنداعى كينوستۋدياسى ەكى سەريالى تەلەفيلم شىعاردى. «ۋاقىت بەدەرلەرى»، «زەردە كىتابى» اتتى جيناقتارى ورىس تىلىندە شىقتى. قىرعىز رەسپۋبليكاسىنىڭ حالىق اقىنى (1994)، قازاقستان رەسپۋبليكاسىنىڭ حالىق جازۋشىسى (1996)، ب ۇ ۇ قورشاعان ورتا باعدارلاماسى سىيلىعىنىڭ، قازاقستان جانە بۇكىلوداقتىق لەنين كومسومولى سىيلىقتارىنىڭ، تۇرىك رەسپۋبليكاسىنىڭ «تۇرىك دۇنيەسىنە قىزمەتى ءۇشىن» حالىقارالىق سىيلىعىنىڭ جانە قىرعىز رەسپۋبليكاسى حالىقارالىق «رۋحانيات»، تۇرىك دۇنيەسى جازۋشىلار بىرلەستىگىنىڭ «شاحريار»، يۋنەسكو-نىڭ «بوورۋكەر» كلۋبى سىيلىقتارىنىڭ يەگەرى. 2002 -جىلى «جازاگەر جادى كوسموفورمۋلاسى» شىعارماسى ءۇشىن كاليفورنيا عىلىم، يندۋستريا، ءبىلىم جانە ونەر اكادەمياسىنىڭ ا. ەينشتەين اتىنداعى التىن مەدالى، تۇركيانىڭ گەبزە قالاسىندا «تۇركى تىلدەس حالىقتار اراسىنداعى ەڭ ۇزدىك الەم اقىنى» سىيلىعى بەرىلگەن. «تىڭ جانە تىڭايعان جەرلەردى يگەرگەنى ءۇشىن»، «ەڭبەكتەگى ەرلىگى ءۇشىن» مەدالدارىمەن ماراپاتتالعان.