بيلەتسىز جولاۋشىنى مىنگىزگەن شىمكەنت- استانا پويىزىنىڭ باستىعى مەن جولسەرىك جۇمىستان شىعارىلدى

استانا. KAZINFORM - ق ت ج-دا بيلەتسىز جولاۋشىلاردى تاسىمالداۋ جانە جول ءجۇرۋ قۇجاتتارىن زاڭسىز ساتۋ فاكتىلەرىنە نولدىك توزىمدىلىك ساياساتى ىسكە اسىرىلۋدا.

كومپانيادا جۇيەلى جۇمىس جۇرگىزىلۋدە، جۇرتشىلىق پەن بۇقارالىق اقپارات قۇرالدارى وكىلدەرىن تارتا وتىرىپ، تۇراقتى ىشكى تەكسەرۋلەر مەن جەكە تەكسەرىستەر باستالدى. وسىنداي جاعدايلاردىڭ ءبىرى الماتى-2 تەمىرجول ۆوكزالىندا بيلەتتەردى زاڭسىز قايتا ساتۋدى جانە جاساندى تاپشىلىقتى انىقتاعان قىزمەتتىك تەكسەرىس بولدى.

«سونداي-اق، شىمكەنت ستانسياسىنداعى تەكسەرۋلەردىڭ بىرىندە بيلەتسىز جولاۋشىنى تاسىمالداۋ فاكتىسى انىقتالدى. «شىمكەنت - استانا» پويىزىنىڭ جولسەرىكتەرى رەسمي ساتىپ الماعان بيلەتسىز ادامدى بەلگىلى ءبىر سوماعا الىپ جۇرۋگە كەلىسكەن.

قىزمەتتىك تەرگەۋ قورىتىندىسى بويىنشا پويىز باستىعى مەن جولسەرىك جۇمىستان شىعارىلدى، ال ەكىنشى جولسەرىك پەن شىمكەنت ستانسياسى ۋچاسكەسى باستىعىنىڭ ورىنباسارىنا قاتاڭ سوگىس بەرىلدى»، - دەپ مالىمدەدى ق ت ج-دان.

بەلگىلى بولعانداي، ىشكى تەكسەرۋلەر ەلدىڭ بارلىق ۆوكزالدارىندا وتۋدە.

ۇلتتىق تاسىمالداۋشى ازاماتتاردى @jolaushylar_tasymaly (direct) پاراقشاسىنا نەمەسە 77767145686+ نومىرىنە فوتو، اۋديو، بەينەماتەريالدار ۇسىنا وتىرىپ، جولاۋشىلاردى بيلەتسىز تاسىمالداۋ جانە بيلەتتەردى زاڭسىز قايتا ساتۋ فاكتىلەرى تۋرالى حابارلاۋعا شاقىرادى.