بەيجىڭدە قازاقستان مەن قىتايدىڭ ءوزارا مادەنيەت جىلىنىڭ اشىلۋ سالتاناتى ءوتتى
استانا. KAZINFORM - بەيجىڭدەگى قىتاي ۇلتتىق وپەرا تەاترىندا قازاقستان- قىتاي مادەني ارالىق جىلىنىڭ اشىلۋ سالتاناتى ءوتتى. مەرەكەلىك كەش ەكى ەلدىڭ جەتەكشى ونەرپازدارىنىڭ باسىن قوستى، دەپ حابارلايدى Kazinform اگەنتتىگىنىڭ بەيجىڭدەگى مەنشىكتى ءتىلشىسى.
قاتىسۋشىلار مەن قوناقتار الدىندا قازاقستان رەسپۋبليكاسى پرەمەر-ءمينيسترىنىڭ ورىنباسارى - مادەنيەت جانە اقپارات ءمينيسترى ايدا بالايەۆا مەن قىتاي حالىق رەسپۋبليكاسىنىڭ تۋريزم جانە مادەنيەت ءمينيسترى سۋن ەلي قۇتتىقتاۋ ءسوز سويلەدى.
كەشتىڭ مادەني باعدارلاماسىندا بىرەگەي قويىلىمدار ۇسىنىلدى. ەكى ەلدىڭ اتاقتى انسامبلدەرى - ابىلاي تىلەپبەرگەن جەتەكشىلىك ەتەتىن قۇرمانعازى اتىنداعى قازاق ۇلتتىق حالىق اسپاپتار وركەسترى جانە ماەسترو جين حۋان جەتەكشىلىك ەتەتىن قىتاي وپەرا جانە بالەتىنىڭ حالىق وركەسترى وزدەرىنىڭ ونەرلەرىن كورسەتتى.
كورەرمەندەر «سارىارقا»، «شالقىما»، «بىرلىگىمىز - قۋانىش» اسپاپتىق انسامبلدەرى، ۆوكالدىق كلاسسيكا «سامال»، «قازاق ەلى» جانە ابايدىڭ ايگىلى «كوزىمنىڭ قاراسى» اندەرى، سونداي-اق «تۋعان جەرىمنىڭ بۇلتتارى»، «مەن سەنى سۇيەم، قىتاي»، «ءتاتتى راۋشان» مەن «لانحۋاحۋا» قىتاي حالىق اندەرىن تىڭدادى.
سونداي-اق باعدارلامادا «قىز سىنى» ءسان كورسەتىلىمى، «سۇلۋلىق سالتاناتى»، «دالا تىنىسى»، «رۋح»، «مىڭ تۇلپار تولقىنى»، «حۋاڭحى» جانە «سۋ رۋحى» حورەوگرافيالىق كومپوزيتسيالارى سوقپالى اسپاپتاردا مانەرلەپ ورىندالدى.
شارانى قازاقستان رەسپۋبليكاسىنىڭ مادەنيەت جانە اقپارات مينيسترلىگى مەن قىتاي حالىق رەسپۋبليكاسىنىڭ تۋريزم جانە مادەنيەت مينيسترلىگى ۇيىمداستىردى.
ەسكە سالا كەتەيىك، 2026 -جىل قازاقستان مەن قىتايدىڭ ارالىق مادەنيەت جىلى بولىپ جاريالانعان بولاتىن. ەكى ەل ءۇشىن جىل بويىنا مادەني ءىس-شارالاردىڭ باعدارلاماسى جوسپارلانعان.
ايتا كەتەيىك، بەيجىڭ باستاۋىش مەكتەبىنىڭ وقۋشىلارى قازاقستان مادەنيەت ورتالىعىنا باردى.
