بەيجىڭدە قازاق مادەني ورتالىعى اشىلادى - ايدا بالايەۆا

Аида Балаева
فوتو: Kazinform

استانا. KAZINFORM - ق ر مادەنيەت جانە اقپارات ءمينيسترى ايدا بالايەۆا استاناداعى ش ى ۇ سامميتىنىڭ ناتيجەلەرى بويىنشا اقپارات جانە مادەنيەت سالاسىندا قانداي ۋاعدالاستىقتار ورناعانىن ايتىپ بەردى.

«مۇندا ەكى اسپەكتىنى قاراستىرۋ كەرەك. ءبىرىنشىسى - قىتاي حالىق رەسپۋبليكاسىنىڭ كوشباسشىسى شي جينپيڭنىڭ ساپارى. ونىڭ مەملەكەتتىك ساپارى اياسىندا مادەني-گۋمانيتارلىق باعىت بويىنشا كەلىسىمدەرگە قول قويىلدى. اتاپ ايتقاندا، استانادا قىتاي مادەني ورتالىعىن جانە بەيجىڭدە - قازاق مادەني ورتالىعىن اشامىز. زاڭ قازىردىڭ وزىندە راتيفيكاتسيالانعان جانە ىسكە كىرىسە الامىز. بۇل قازاقستان- قىتاي قاتىناستارى تاريحىندا تۇڭعىش رەت بولىپ وتىر. العاش رەت مۇنداي ىنتىماقتاستىق ينستيتۋتسيونالدى تۇردە جۇزەگە اسىرىلۋدا جانە ارينە، بۇل مادەني ورتالىقتار ەكى ەل حالىقتارىنىڭ ءبىر-بىرىمەن جاقىنىراق تانىسۋىنا ىقپال ەتەدى»، - دەدى مينيستر Silk way تەلەارناسىنا بەرگەن سۇحباتىندا.

ونىڭ ايتۋىنشا، بەيجىڭدەگى مادەني ورتالىق حالىق كوپ جۇرەتىن تۋريستىك ورىن - اربات ماڭىندا ورنالاسقان. مادەني ورتالىقتاردىڭ قىزمەتى اياسىندا ادەبي سالا، كونسەرتتىك قىزمەت جانە بەينەلەۋ ونەرى سىندى ماسەلەلەردىڭ بارلىق سپەكترى قامتىلادى.

اقپارات جانە كينو ونەرى سالاسىنداعى كەلىسىمدەر جاقىن ارادا ناقتى جوبالار تۇرىندە ءوز ناتيجەلەرىن بەرەدى.

«سوندىقتان ش ى ۇ-عا ءتوراعالىق ەتۋ جانە تۇتاستاي العاندا ش ى ۇ ۇيىمىنا كىرەتىن ەلدەردىڭ ءوزارا ءىس-قيمىلى ءبىرقاتار ماسەلەنى شەشۋگە ىقپال ەتەدى. اتاپ ايتقاندا، ءبىزدىڭ مينيسترلىك سەرىكتەستەرمەن وتە تىعىز قارىم-قاتىناستا جانە ءبىزدىڭ ەلدەرىمىز اراسىنداعى ەكىجاقتى قارىم-قاتىناستاردىڭ دامۋىنا ىقپال ەتەتىن بىرلەسكەن جوبالار پايدا بولۋدا. كەشە ءبىزدىڭ كوشباسشىلارىمىز قىتاي مەن قازاقستاننىڭ ءوزارا ءىس-قيمىلى جاڭا ساپالى دەڭگەيگە كوتەرىلگەنىن، بۇل ءبىزدىڭ ەلدەرىمىز اراسىنداعى ءوزارا ءىس-قيمىلدىڭ جاڭا ءداۋىرى ەكەنىن راستادى. سوندىقتان ءبارى، ەڭ الدىمەن، مەملەكەتتىك ورگانداردىڭ قالاي جۇمىس ىستەيتىنىنە جانە قارىم-قاتىناستاردى ودان ءارى نىعايتۋعا جانە تەرەڭدەتۋگە ىقپال ەتەتىنىنە بايلانىستى»، - دەپ تولىقتىردى ءسوزىن ا. بالايەۆا.

اۆتور

ايجان سەرىكجان قىزى

سوڭعى جاڭالىقتار