بيشىمبايەۆتىڭ ۇكىمىن جەڭىلدەتۋ ءۇشىن 100 ميلليون تەڭگە العان ەلوردا تۇرعىنى تەرگەلىپ جاتىر
استانا. KAZINFORM - ەلوردا تۇرعىنى بيشىمبايەۆتىڭ ۇكىمىن جەڭىلدەتۋ سىلتاۋىمەن الداۋ ارقىلى 100 ميلليون تەڭگەنى جىمقىرعان.
سىبايلاس جەمقورلىققا قارسى قىزمەت ق. بيشىمبايەۆتىڭ تۋىستارىنىڭ ءوتىنىشى بويىنشا ەلوردا تۇرعىنى «گ» - عا قاتىستى سوتقا دەيىنگى تەرگەۋ جۇرگىزىپ جاتىر.
اگەنتتىك مالىمەتىنشە، ول اسا ءىرى مولشەردە الاياقتىققا وقتالعانى، ياعني ق. بيشىمبايەۆتىڭ ۇكىمىن جەڭىلدەتۋ سىلتاۋىمەن الداۋ ارقىلى 100 ميلليون تەڭگەنى يەمدەنۋ بويىنشا كۇدىكتى. سونىمەن قاتار كۇدىكتىنىڭ ءىس-ارەكەتى اسا ءىرى مولشەردە پارا بەرۋگە يتەرمەلەۋ بويىنشا سارالاندى. ونىڭ قىلمىستىق ارەكەتىنىڭ باسقا ەپيزودتارى تەكسەرىلىپ جاتىر.
كۇدىكتى سوتتىڭ سانكسياسىمەن قاماۋعا الىندى. تەرگەۋ جالعاسىپ جاتىر.
قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى. كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.
«سىبايلاس جەمقورلىققا قارسى قىزمەت مەملەكەتتىك ورگانداردىڭ قىزمەتىنە بايلانىستى قانداي دا ءبىر ماسەلەلەردى شەشۋ سىلتاۋىمەن الاياقتىقتىڭ، ونىڭ ىشىندە پارا بەرۋگە يتەرمەلەۋمەن ۇشتاسقان الاياقتىقتىڭ جالعاسىپ جاتقان جاعدايلارىنا نازار اۋدارادى»، - دەلىنگەن حابارلامادا.
